اسلام آباد پولیس ہماری بنیاد اور عزت ہے، شہریار آفریدی


اسلام آباد: وزیر مملکت برائے داخلہ شہریار آفریدی نے کہا کہ پولیس ہماری بنیاد اور عزت ہے، پولیس کے بچے اور ورثا میرے بچے اور میری عزت ہیں۔

اسلام آباد پولیس لائن میں شہدا کو خراج عقیدت پیش کرنے کی تقریب سے خطاب کرتے ہوئے وزیر مملکت کا کہنا تھا کہ میرا آپ سے وعدہ ہے کہ اسلام آباد پولیس کو ماڈل پولیس بنائیں گے، ہم اپنی پولیس کو دوسرے صوبوں کی پولیس کے مقابلے میں زیادہ مضبوط بنائیں گے۔

وزیر مملکت برائے داخلہ کا کہنا تھا کہ اللہ جسے چاہتا ہے آزماتا ہے ، شہادت کا رتبہ بہت بلند ہے، پاکستان کی ماہیں اپنے شہید بیٹوں پر فخر کرتی ہیں۔ انہوں نے کہا کہ میرے اپنے گھر میں یتیم بچے ہیں، اسی لیے میں  شہدا کے خاندان کی آزمائشوں سے آگاہ ہیں۔

انہوں نے کہا کہ پولیس کے سپاہیوں کو اپنے سینئر افسران تک رسائی نہیں دی جاتی، ان کے ساتھ جو زیادتیاں ہوں وہ اعلیٰ عہدیداران تک بات نہیں پہنچا سکتے، انہوں نے آئی جی اسلام آباد کو سپاہیوں کی اعلیٰ حکام تک رسائی آسان بنانے کی ہدایات کیں۔

ان کا کہنا تھا کہ پولیس اور شہدا کے ورثا کے لیے میرے دروازے ہمیشہ کھلے ہیں، جو بھی مسائل ہیں میرا دفتر اور میری وزارت آپ کے لیے ہمیشہ حاضر رہے گی۔

وزیر مملکت کا کہنا تھا کہ میں اور میرا وزیر اعظم آپ کو کبھی مایوس نہیں کریں گے، آپ کو اتنی عزت دی جائے گی کہ آپ خود اس کا احساس کریں گے۔ انہوں نے بتایا کہ ہماری وزارت کا کام پولیس کو تمام تر سہولیات اور ٹیکنالوجی فراہم کرنا ہے۔ تاکہ میری پولیس کسی پر انحصار نہ کرے۔

انہوں نے کہا کہ میری پولیس کی تربیت ایسی ہوگی کہ مجھے پنجاب پولیس یا رینجرز کی مدد نہ لینی پڑے۔

شہریار آفریدی کا کہنا تھا کہ قوم بہت اضطراب سے گز رہی ہے، ہمارے جوان اس ملک کے لیے لازوال قربانیاں دے رہے ہیں، نئے پاکستان میں آپ سے وعدہ ہے ہم آپ کی ضروریات، مفادات اور ترجیحات پر کبھی سجھوتہ نہیں کریں گے۔


متعلقہ خبریں