سرینگر: مقبوضہ کشمیرمیں قابض بھارتی فوج کے مظالم کا سلسلہ جاری ہے۔ شوپیاں میں بھارتی فوج نے ریاستی دہشت گردی کرتے ہوئے مزید آٹھ نوجوانوں کو شہید کر دیا ہے۔
بھارتی فوج نے تمام افراد کو نام نہاد سرچ آپریشن کے دوران شہید کیا گیا ہے۔ شوپیاں میں انٹرنیٹ سروس بھی معطل کر دی گئی ہے جب کہ بٹہ گنڈ میں بھی بھارتی فورسز نے ناکہ بندی کر کے سرچ آپریشن کیا۔
کشمیری رہنما میر واعظ عمر فاروق نے سماجی رابطے کی ویب سائٹ ٹوئٹر پر کہا ہے کہ گزشتہ تین روز کے دوران بھارتی فوج نے 17 بے گناہ کشمیریوں کو شہید کر دیا ہے جب کہ پیلٹس کی وجہ سے متعدد کشمیری زخمی ہوگئے ہیں جن میں 20 ماہ کی ہبا نثار بھی شامل ہے جس کی آنکھیں متاثر ہوئی ہیں۔
As 17 Kashmiri’s are killed in last 3days,Mayhem let loose by forces in Batgund Shopian!bullets fired,civilians killed,while dozens grievously injured as pellets rain on them!Even 20 month old Baby Hiba Nisar hit by pellets in her eyes!Urgent appeal for help to stop this genocide pic.twitter.com/50dF6aReqP
— Mirwaiz Umar Farooq (@MirwaizKashmir) November 25, 2018
مقبوضہ کشمیر میں گزشتہ کچھ عرصے سے بھارتی درندگی میں اضافہ ہو گیا ہے اور کشمیر کے مختلف علاقوں میں نام نہاد سرچ آپریشن کی آڑ میں کشمیری نوجوانوں کو شہید کیا جا رہا ہے جب کہ اکثر موبائل اور انٹرنیٹ سروس بھی معطل کر دی جاتی ہے۔
دو روز قبل بھی بھارتی فوج نے کوسکی پورہ میں سرچ آپریشن کرتے ہوئے چھ نوجوانوں کو شہید کر دیا تھا اور سرینگر سمیت کئی شہروں میں موبائل اور انٹرنیٹ سروس دن بھر معطل رہی تھی۔
کشمیر میڈیا سروس کے مطابق رواں سال 21 اکتوبر کو بھی کلگام میں بھارتی فوج کی جانب سے سرچ آپریشن کے دوران 14 سے زائد کشمیریوں کو شہید کر دیا گیا تھا اور انسانی حقوق کی عالمی تنظیم ایمنسٹی انٹرنشینل انڈیا (اے آئی آئی) کی جانب سے کلگام میں کشمیریوں کے قتل کے خلاف آزاد اور منصفانہ تحقیقات کا مطالبہ بھی کیا گیا تھا۔