واشنگٹن: امریکی صدر ڈونلڈ ٹرمپ نے روس اور یوکرائن کے درمیان پیدا ہونے والی سمندری کشیدگی پر روسی صدر پیوٹن سے طے شدہ ملاقات کرنے سے انکار کر دیا ہے۔
سماجی رابطے کی ویب سائٹ ٹوئٹر پہ جاری اپنے پیغام میں ڈونلڈ ٹرمپ نے کہا ہے کہ “حقیقت یہ ہے کہ روس کے قبضے سے یوکرائن کے بحری جہاز اور سیلرز واپس نہیں گئے ہیں توایسی صورتحال میں سب کے لئے بہتر یہی ہے کہ جب تک یہ مسئلہ حل نہیں ہو جاتا اس وقت تک روسی صدر پیوٹن سے جی 20 اجلاس میں طے شدہ ملاقات نہیں کی جائے”۔
Based on the fact that the ships and sailors have not been returned to Ukraine from Russia, I have decided it would be best for all parties concerned to cancel my previously scheduled meeting….
— Donald J. Trump (@realDonaldTrump) November 29, 2018
ڈونلڈ ٹرمپ کا مؤقف ہے کہ ’’روس اور یوکرائن کا معاملہ حل ہوتے ہی ارجنٹائن میں روسی صدر ولادی مرپیوٹن کے ساتھ دوبارہ بامعنی مذاکرات آگے بڑھ سکتے ہیں‘‘۔
امریکہ کے صدر ٹرمپ نے یہ ٹوئٹ ارجنٹائن میں منعقدہ جی 20 سمٹ میں روانگی سے قبل اپنے خصوصی طیارے ایئر فورس ون سے کی۔ روانگی سے ایک گھنٹہ قبل امریکی صدر نے میڈیا سے گفتگو کرتے ہوئے بتایا تھا کہ جی 20 سمٹ اجلاس میں روسی صدر سے ملاقات کریں گے۔
ڈونلڈ ٹرمپ کے اس طرح اپنے بیانیے سے ہٹ جانے کو سیاسی مبصرین حیران کن عمل قرار دے رہے ہیں۔
….in Argentina with President Vladimir Putin. I look forward to a meaningful Summit again as soon as this situation is resolved!
— Donald J. Trump (@realDonaldTrump) November 29, 2018
روس اور یوکرائن کے درمیان گزشتہ کچھ عرصے سے جاری کشیدگی میں اس وقت مزید اضافہ ہوا جب اتوار کے دن روسی افواج نے یوکرائنی جنگی بحری جہازوں و کشتیوں پر سمندری حدود کی خلاف کا الزام عائد کرتے ہوئے قبضہ کرلیا۔
غیر ملکی خبر رساں ادارے کا کہنا ہے کہ بیونس آئرس میں ہونے والے جی 20 ممالک کے اجلاس میں ٹرمپ اور پیوٹن کے درمیان ملاقات طے تھی۔ امریکہ نے یورپی ممالک سے یوکرائن کو مزید مدد فراہم کرنے کا مطالبہ کیا ہے۔
