اسلام آباد: پاکستان پیپلز پارٹی کے رہنما ناصر حسین شاہ نے کہا کہ جے آئی ٹی کو جس طرح میڈیا پر لیک کیا گیا وہ سب کے سامنے ہے۔ ان کا کہنا تھا کہ سب کو نظر آرہا ہے کہ اس وقت یک طرفہ احتساب ہو رہا ہے۔
ہم نیوز کے پروگرام پاکستان ٹونائٹ میں میزبان ثمرعباس سے گفتگو کرتے ہوئے انہوں نے کہا کہ ان کی اپنی نیب زدہ لوگ بیٹھے ہوئے ہیں۔ اس حکومت نے ریکارڈ قرضے لیے ہیں آج تک کسی حکومت نے اتنے قرضے نہیں لیے۔ ہمارے لیے میڈیا ٹرائل یا یہ الزامات کوئی نئی نات نہیں۔
مولانا فضل الرحمان کے ساتھ زرداری کی ملاقات کے حوالے سے بات کرتے ہوئے انہوں نے کہا کہ کسی گرینڈ الائنس کی کوئی بات نہیں ہورہی اور نہ ہی کوئی گرینڈ الائنس بننے جارہا ہے۔ زرداری سے مولانا کی ملاقات معمول کی ملاقات تھی۔
نواز شریف کو جہاں سے تکلیف ملی ہے وہیں سے ریلیف ملے گا،عارف نظامی
تجزیہ نگار عارف نظامی نے کہا کہ حکومت کی حکمت عملی غلط تھی۔ جے آئی ٹی کی ضرورت نہیں تھی اور جے آئی ٹی کی وجہ سے اس کیس کو سیاسی رنگ ملا۔
انہوں نے کہا کہ میاں نواز شریف نے زرداری سے ملاقات کرنے کی جانب توجہ نہیں دی۔ انہوں نے کہا کہ موجودہ حالات میں دونوں جماعتیں نزدیک ضرور آچکی ہیں کیونکہ اس وقت ان کے لیے الگ الگ سیاست کرنا ممکن نہیں۔
ان کا کہنا تھا کہ ڈیل ہونے باتوں کو رد نہیں کیا جاسکتا کیونکہ نواز شریف کے خلاف جس طرح کے فیصلے آرہے ہیں اس کے بعد انہیں وہیں سے ریلیف ملے گا جہاں سے انہیں مشکلات میں ڈالا گیا ہے۔ان کا کہنا تھا کہ جب نیب اور حکومت کا موقف ایک ہوگا تو پھر کیا ہوگا۔
زرداری کا کیس آج کا نہیں 2015 کا ہے،شاہ خاور
پروگرام میں موجود ماہر قانون شاہ خاور نے کہا ہے کہ موجودہ حکومت کچھ نہیں کررہی، زرادری کا کیس آج کا نہیں 2015 کا ہے۔ پاکستان پیپلز پارٹی خود بھی حکومت میں ہے۔ ان کا کہنا تھا کہ جے آئی ٹی سامنے آنے کے بعد شہزاد اکبر اور ان کے ساتھی نے اس پر پریس کانفرنس کی اور لوگوں کو سزا بھی دے دی جس پر سپریم کورٹ نے بہت سخت ایکشن لیا۔
انہوں نے کہا کہ موجودہ مقدمات میں موجودہ حکومت کا کوئی قصور نہیں ہے لیکن حکومت کی غلطیوں کی وجہ سے عوام میں یہ تاثر بن رہا ہے کہ سب کچھ موجودہ حکومت کررہی ہے۔
ہم اداروں کے ساتھ تعاون کررہے ہیں،صداقت علی عباسی
پروگرام میں موجود پی ٹی آئی کے رہنما صداقت علی عباسی نے کہا ہے کہ ہمارے سیاسی بیانیے کا فائدہ اٹھانے کی کوشش کی جارہی ہے۔
ان کا کہنا تھا کہ ہم احتساب کے خلاف سیاسی سطح پر کھڑے ہیں اور اداروں کے ساتھ تعاون کررہے ہیں۔ یہ حکومت اداروں کا احترام بھی کرے گی اور انہیں سپورٹ بھی کرے گی تاکہ ادارے کام کرسکیں۔
مولانافضل الرحمان کے بارے میں بات کرتے ہوئے انہوں نے کہا کہ مولانا فضل الرحمان کی سیاست کی کوئی اہمیت نہیں۔ اس وقت پیپلز پارٹی اچھا کردار ادا کررہی ہے۔ ان کا کہنا تھا کہ ہم چاہتے ہیں کہ سب اپنا اپنا کام کریں۔
