کراچی سے گرفتار دہشت گرد کے اہم انکشافات

فوٹو: ہم نیوز


کراچی: کراچی میں گرفتار ہونے والے دہشت گرد نے خودکش بمبار کی تیاری میں مہلک ادویات کے استعمال کا انکشاف کر دیا ہے۔

کراچی میں گرفتار ہونے والے خودکش بمبار نے انکشاف کیا ہے کہ ٹارگٹ پر جانے سے قبل مختلف انجکشن لگائے جاتے اور رقم کا لالچ دیا جاتا ہے۔

گزشتہ دنوں سی ٹی ڈی آپریشن ٹو کے ہاتھوں گرفتار ہونے والے دہشت گرد فہیم عرف محمد صاحب نے کہا ہے کہ خودکش بمبار کو گروپ میں شمولیت کے وقت سر میں انجیکشن لگایا جاتا ہے اور انجکشن لگنے کے بعد خود کش بمبار نیم غنودگی کی حالت میں چلا جاتا ہے۔

انٹیروگیشن رپورٹ کے مطابق دہشت گرد نے کہا کہ اُسے حملے کی تیاری سے قبل بھی ہونٹ کے اندرونی حصے پر کٹ لگا کر ایک اور انجکشن لگایا گیا تھا جس کے بعد مجھے خوشی محسوس ہو رہی تھی اور نظریں صرف ٹارگٹ پر تھیں۔

گرفتار دہشت گرد نے انکشاف کیا کہ ہمارے گروپ لیڈر نے مارے جانے کی صورت میں ڈیڑھ لاکھ روپے افغانی دینے کا کہا تھا جب کہ دہشت گرد نے افغانستان سے پاکستان نقل و حرکت کے لئے افغان پاسپورٹ بھی بنا رکھا تھا۔


متعلقہ خبریں