شیخ رشید نے بلاول بھٹو کو معاف کر دیا

فیصل آباد:وزیر ریلوے نے کہا کہ اللہ کے نبی صلی اللہ علیہ وآلہ وسلم نے کہا کہ معاف کرنے میں عظمت ہے لہٰذا میں نے چیئرمین پاکستان پیپلز پارٹی (پی پی پی) بلاول بھٹو کو معاف کر دیا ہے۔

فیصل آباد میں میڈیا سے گفتگو کرتے ہوئے ان کا کہنا تھا کہ بلاول بھٹو سے متعلق جو باتیں کہ چکا ہوں اس پر قائم ہوں، تاہم ان سے میری صلح ہو چکی ہے۔

نوازشریف کی صحت سے متعلق سوال پر ان کا کہنا تھا کہ راولپنڈی لال حویلی میں پتھری کا علاج دم درود سے ہی کر لیا جاتا ہے، نواز شریف کا علاج لال حویلی میں موجود ہے۔

شیخ رشید سے متعلق بیان پر بلاول بھٹوکی معذرت

انہوں نے کہا کہ وزیراعظم عمران خان وزیراعلیٰ پنجاب عثمان بزدار کے ساتھ سیسہ پلائی دیوار کی طرح کھڑے ہیں۔

شیخ رشید نے کہا کہ دنیا میں آزاد خارجہ پالیسی اور دفاع کے لئے ضروری ہے کہ اس ملک کی معیشت مضبوط ہو۔انہوں نے کہا دنیا کی جس جگہ ہم بیٹھے ہیں اسے چرچل پوسٹ کہتے ہیں۔

انہوں نے کہا کہ دنیا کی مہنگی ترین اورنج لائن ٹرین بنائی جا رہی ہے ہمیں بات تب سمجھ آتی ہے جب ہم سب کچھ لٹا چکے ہوتے ہیں۔ سابق حکومتوں میں جو کچھ ریلوے کے ساتھ ہوا ہے اس کا کیا حال بتاؤں ہم نے پرانی ٹرینوں کی مرمت کر کے لوگوں کی سہولت کے لئے چلائی ہیں۔

وزیر ریلوے نے کہا اگر پاکستان کی ریل نہ چلی تو معیشت بھی نہیں چل سکے گی،پنجاب کے سرمایہ کاروں کو ٹرانسپورٹ کے کاروبار میں سرمایہ کاری کرنی چاہیئے۔

انہوں نے کہا کہ جس طرح ملک کو اپاہج کر کے چھوڑا گیا عمران خان کا حوصلہ ہے کہ وہ اسے چلا رہا ہے ، مجھے خوشی ہے کہ کاروبار برادری نے عمران خان کی پالیسیوں پر اعتماد کا اظہار کیا ہے۔