اسلام آباد: عالمی شہرت یافتہ ٹینس اسٹار ثانیہ مرزا اپنے وطن کے انتہاپسند ہندوؤں سے ملنے والی تمام تر دھمکیوں کو یکسر نظرانداز کرکے دبئی میں اپنے خاوند اور ممتاز کرکٹر شعیب ملک کو پی ایس ایل میں سپورٹ کرنے پہنچ گئیں۔
ہم نیوز کے مطابق بھارت کی ’بیٹی‘ نے جب پاکستانی ’بہو‘ ہونے کے ناطے دبئی میں سابق پاکستانی کرکٹرز اور ان کی فیملیز کو پرتکلف عشائیہ دیا تو ’پاکستانیوں‘ نے نہ صرف شکریہ ادا کیا بلکہ سماجی رابطوں کے ویب سائٹ ’ٹوئٹر‘ پردنیا ئے ٹینس کی اسٹار کھلاڑی ثانیہ مرزا اوران کے خاوند معروف آل راؤنڈر شعیب ملک کو ’تھینک یو ویری مچ‘ بھی کہا۔
ثانیہ مرزا کا پی ایس ایل میں شریک اپنے خاوند شعیب ملک کی سپورٹ میں دبئی پہنچنا فی الوقت اس لیے معنی رکھتا ہے کہ پلوامہ واقع کے بعد سے انتہاپسند ہندوؤں کی جانب سے انہیں تسلسل کے ساتھ کڑی نکتہ چینی کا نشانہ بنایا جارہا ہے۔
پاکستان اور مسلمان دشمنی میں اندھی ہونے والی بی جے پی کے رکن اسمبلی ٹی راجہ سنگھ نے فروری 2019 کے تیسرے ہفتے میں مطالبہ کیا تھا کہ عالمی شہرت یافتہ ٹینس اسٹار ثانیہ مرزا کو ’برانڈ ایمبسیڈر آف تلنگانہ‘ کے منصب سے فارغ کیا جائے۔
جنوبی بھارت کی ریاست تلنگانہ میں بھارتیہ جنتا پارٹی کے واحد رکن اسمبلی ٹی راجہ سنگھ کے مطابق ثانیہ مرزا پاکستان کی ’بہو‘ ہیں یعنی ان کا سب سے بڑا ’قصور‘ یہی ہے کہ وہ شعیب ملک کی اہلیہ ہیں۔
بی جے پی کے رکن اسمبلی نے خود کو ہی قانون ’قرار‘دیتے ہوئے یہ فیصلہ بھی سنا دیا تھا کہ ثانیہ مرزا جو پاکستانی سے شادی کرنے کی وجہ سے بھارتی شہری بھی نہیں ہیں اور پاکستانی بہو ہیں کو برانڈ ایمبسیڈر آف تلنگانہ کے منصب سے ہٹا دیا جائے۔
گزشتہ دنوں بھارت کے انتہا پسند ہندوؤں نے سماجی رابطے کی ویب سائٹ پر یہاں تک کہا کہ وہ شعیب ملک کو بھارت نہیں آنے دیں گے۔
Hamara #PakistanZindabad ????
— Shoaib Malik ?? (@realshoaibmalik) February 27, 2019
اسٹار آل راؤنڈر شعیب ملک نے چند دن قبل ’ہمارا پاکستان زندہ باد‘ کا ٹوئٹ کیا تھا جبکہ ثانیہ مرزا نے ونگ کمانڈر ابھی نند کی واپسی پر خوشی کا اظہار کرتے ہوئے انہیں ہیرو قرار دیا تھا۔
پاکستان اور بھارت کے درمیان انتہائی کشیدہ صورتحال کے باوجود ثانیہ مرزا پی ایس ایل میں شریک اپنے خاوند کو سپورٹ کرنے دبئی پہنچیں تو انہوں نے سابق پاکستانی کرکٹرز اوران کی فیملیز کو ڈنر پہ بلایا۔
ثانیہ مرزا اور شعیب ملک کی جانب سے دیے گئے پرتکلف عشائیہ میں وسیم اکرم ، معین خان ، وقار یونس ، مصباح الحق اور دیگرنے اپنی فیملیز کے ہمراہ شرکت کی۔
ہم نیوز کے مطابق پاکستانی کرکٹرز نے اپنی بیگمات کے ساتھ ڈنر کو خوب انجوائے کیا۔ اس موقع کو یادگار قراردیتے ہوئے کرکٹرز نے متعدد گروپ فوٹوز بنوائے۔
ڈنر میں شریک پاکستانی کرکٹرز کی بیگمات نے بھی کئی سیلفیاں بنائیں اور پرتکلف عشائیہ سے بھرپور لطف اٹھایا۔
قومی کرکٹ ٹیم کے سابق کپتان مصباح الحق کی اہلیہ عظمیٰ خان نے عشائیہ میں شرکت کے بعد سماجی رابطے کی ویب سائٹ ’ٹوئٹر‘ پر شعیب ملک اور ثانیہ مرزا کا شکریہ ادا کیا اور ڈنر کی شاندار تصاویر بھی شیئر کیں۔
Thank you @MirzaSania & @realshoaibmalik for the yummy dinner & feel proud to be a part of legendary heroes get-together like @wasimakramlive @waqyounis99 Moin khan, Muhammad Akram @captainmisbahpk @REALsaeedajmal @iamShaniera pic.twitter.com/vrKOfx0H20
— Uzma Khan (@uzeekhanjee) March 3, 2019
ہم نیوز کے مطابق دنیائے ٹینس میں عالمی شہرت یافتہ ثانیہ مرزا نے ملتان سلطانز کےاونرعلی ترین سے بھی ملاقات کی۔
