پی ایس ایل ایلیمینیٹر: اسلام آباد کو ہراکر پشاور فائنل میں


کراچی: پاکستان سپر لیگ (پی ایس ایل) فور کے دوسرے ایلیمینیٹر میں پشاور زلمی نے اسلام آباد یونائیٹڈ کو 49 رنز سے شکست دے کر فائنل میں جگہ بنالی

کراچی کے نیشنل اسٹیڈیم میں کھیلے گئے میچ میں اسلام آباد یونائیٹڈ کے کپتان محمد سمیع نے ٹاس جیت کر پہلے فیلڈنگ کا فیصلہ کیا۔

پشاور زلمی کو اوپنرز کامران اکمل اور امام الحق نے 135 رنز کا شاندار آغاز فراہم کیا۔ کامران اکمل نے 74 جبکہ امام نے 58 رنز کی شاندار اننگزکھیلی۔

پشاور کے آگے آنے والے بلے بازوں نے بھی رنز کی رفتار کم نہ کی اور اسلام آباد کے بولرز کو مسلسل پریشان کیے رکھا۔

زلمی کی جانب سے پولارڈ نے 37 جبکہ کپتان ڈیرن سیمی نے 30 رنز کی جارحانہ اننگز کھیل کر اپنی ٹیم کو 214 رنز تک پہنچادیا۔

اسلام آباد کی جانب سے کیمرون ڈیلپورٹ نے دو جبکہ شاداب خان نے ایک کھلاڑی کو آؤٹ کیا۔

جواب میں اسلام آباد یونائیٹڈ کا آغاز اچھا نہ تھا اور اسکی پہلی وکٹ 24 جبکہ دوسری 26 کے اسکور پر لیوک رانچی اور ایلکس ہیلز کی صورت میں گرگئی۔

ڈیلپورٹ (28) اور والٹن (48) کے درمیان شراکت نے اسلام آباد کی اننگز کو سہارا دیا تاہم اس شراکت کے بعد زلمی کے گیندبازوں نے کم بیک کرتے ہوئے کئی یونائیٹڈ بلے بازوں کو پویلین پہنچایا۔ اسلام آباد کی پوری ٹیم 166 رنز ہی بناسکی۔

اسلام آباد کی جانب سے والٹن 48، فہیم اشرف 31 اور ڈیلپورٹ 28 رنز کے ساتھ نمایاں رہے۔ زلمی کی جانب سے حسن علی اور کرس جارڈن نے تین، تین جبکہ ٹامل ملز، وہاب ریاض اور کیرون پولارڈ نے ایک، ایک کھلاڑی کو آؤٹ کیا۔

شاندار اننگز کھیلنے پر کامران اکمل کو میچ کا بہترین کھلاڑی قرار دیا گیا۔ زلمی کا مقابلہ فائنل میں 17 مارچ کو کوئٹہ گلیڈی ایٹرزسے ہوگا۔


متعلقہ خبریں

تازہ ترین

پوائنٹس ٹیبل
ٹیم میچز پوائنٹس
کراچی کنگز 5 6
پشاور زلمی 5 6
اسلام آباد یونائیٹڈ 4 6
لاہور قلندرز 4 6
ملتان سلطانز 4 2
کوئٹہ گلیڈی ایٹرز 5 2