اسلام آباد: ملکی دارالحکومت اسلام آباد میں ڈرونز کے ذریعے شجر کاری منصوبہ تیار کیا گیا ہے، جس کے تحت ڈورن شہر بھر میں شجر کاری کے لیے استعمال کیے جائیں گے۔
یہ بھی پڑھیں: سرسبز و شاداب پاکستان’ شجر کاری مہم کا افتتاح
ڈپٹی کمشنر اسلام آباد نے سماجی رابطے کی ویب سائٹ پر اپنے ایک ٹویٹ پیغام میں بتایا کہ جلد ڈرون کے ذریعے کی جانے والی شجر کاری مہم کا افتتاح کیا جائے گا اور یہ پاکستان میں پہلی مرتبہ کیا جائے گا۔
پاکستان میں پہلی بار اسلام آباد میں ڈرون کے ذریعے شجرکاری کا پلان تیار۔ انشاءاللہ بہت جلد چیف کمیشنر اسلام آباد اس کا افتتاح کریں گے pic.twitter.com/P7u3TukkfG
— Deputy Commissioner Islamabad (@dcislamabad) March 17, 2019
واضح رہے سات ماہ قبل حکومت کی جانب سے گرین پاکستان مہم کا آغاز کیا گیا تھا جس کے تحت وزیر اطلاعات فواد چوہدری نے اسلام آباد میں پودا لگایا تھا۔
اس موقع پر فواد چوہدری کا کہنا تھا کہ پاکستان ان ممالک میں شامل ہے جہاں جنگلات کو شدید نقصان پہنچا ہے، اس وقت ہمارے ملک میں پودے ختم ہوتے جا رہے ہیں۔
وزیر اطلاعات و نشریات نے کہا تھا کہ خیبرپختونخوا ( کے پی ) میں گزشتہ پانچ سال تحریک انصاف کی حکومت نے بلین ٹری سونامی منصوبہ شروع کیا تھا، اب ہمارا آئندہ 5 سال میں 10 ارب پودے لگانے کا ہدف ہے جس کا افتتاح باقاعدہ طور پر وزیر اعظم پاکستان عمران خان نے کردیا ہے۔
انہوں نے کہا تھا کہ وزیراعظم عمران خان کا ماحولیات اور پودوں کے حوالے سے وژن بہت واضح ہے، پاکستان میں کوئی اور سیاسی جماعت یا سیاستدان ماحول کو بہتر کرنے کی بات نہیں کرتا۔ تحریک انصاف کے منشور میں ہی عمران خان نے ماحولیات کی آگاہی کے حوالے سے واضح ہدایت دے رکھی ہے۔