پاکستان کے سو سال، رہبر ترقی و کمال


اسلام آباد: اداکار احسن خان نے کہا کہ پاکستان کو 2047 تک ایک ترقی یافتہ اور کامیاب ملک دیکھنے کے لئے خلوص دل سے کام کرنے والے لوگوں کی حوصلہ افزائی کرنا ہو گی۔

پاکستان کے سو سال کے حوالے سے جاری اپنے ویڈیو پیغام میں ان کا کہنا تھا کہ ملک میں شفافیت کے فروغ کے لئے اصلاحات کی تفصیلات عوام کے سامنے لانا بہت ضروری ہیں جبکہ  ہر شہری کو  آواز اٹھانے کی اجازت دینی ہو گی۔

اداکار عدنان صدیقی نے کہا کہ ملک میں ترقی کی شرح کو بڑھانےکے لئے لڑکیوں کو بھی عملی میدان میں لڑکوں کے شانہ بشانہ کام کرنے کی اجازت دینا ہو گی۔ پاکستان میں اب تک 25 فیصد لڑکیاں کام کر رہی ہیں جبکہ یہ تناسب 32 فیصد ہونا چاہئے۔

پاکستان کے سو سال کے حوالے سے جاری اپنے ویڈیو پیغام میں انہوں نے کہا کہ پاکستان کو 2047 تک ایک کامیاب ملک بنانے کے لئے تیزی سے بڑھتی ہوئی نوجوان آبادی کو ترقی میں اہم کردار ادا کرنا ہو گا اور ترقی تب ہی ہو گی جب سب کو مناسب روزگار ملے گا۔

بچوں اور ماؤں کی صحت میں سرمایہ کاری کرنے کی ضرورت، عائشہ عمر

پاکستان کے سو سال کے حوالے سے جاری اپنے ویڈیو پیغام میں اداکارہ عائشہ عمر نے کہا کہ ہمیں بچوں اور ماؤں کی صحت میں سرمایہ کاری کرنے کی ضرورت ہے۔

انہوں نے کہا کہ مکمل غذائیت نہ ملنے کے باعث بچوں کی نشوونما نہیں ہو پاتی اور وہ بڑے ہو کر ہائی ٹیک دنیا کا سامنا نہیں کر پاتے۔

ملک میں سرمایہ کاری کے لئے بہتر ماحول دینے کی ضرورت ہے، عقیل کریم ڈیڈی

اے کے ڈی کمپنی کے چئرمین عقیل کریم ڈیڈی نے کہا کہ بچت ایک اچھی عادت ہے اس سے ملک کو بھی فائدہ ہے۔

پاکستان کے سو سال کے حوالے سے جاری اپنے ویڈیو پیغام میں انہوں نے کہا کہ ملک میں سرمایہ کاری کے لئے بہتر ماحول دینے کی ضرورت ہے اگر سرمایہ کاری ہو گی تب ہی نوجوانوں کو روزگار ملے گا۔

ان کا کہنا تھا کہ ملک کی ترقی میں ہمیں اپنا حصہ ڈالنا ہے تاکہ پاکستان 2047 میں ایک کامیاب ملک بن کر ابھر سکے۔

ملکی ترقی کے لئے آبادی کا کنڑول بہت ضروری ہے، جاوید شیخ

اس حوالے سے معروف اداکار جاوید شیخ نے کہا کہ اگر آبادی میں اضافے کی شرح دو فیصد سے ایک فیصد بھی ہو جائے تب بھی 2047 تک ہم 30 کروڑ ہو جائیں گے، اس لئے آبادی پر کنڑول کرنا بہت ضروری ہے۔

کرپشن کا راستہ روکنے کے لئے اصلاحات کا راستہ اپنانا ہو گا، بشریٰ انصاری

اس حوالے سے بشریٰ انصاری نے اپنے پیغام میں  کہا کہ کرپشن کا راستہ روکنے کے لئے اصلاحات کا راستہ اپنانا ہو گا جبکہ ملک کو درست سمت لے کر جانے کے لئے سخت فیصلے کرنے کی ضرورت ہے۔

انہوں نے کہا کہ پاکستان میں اس وقت ٹیکس دینے والوں کی تعداد بہت کم ہے جسے بڑھانے کی ضرورت ہے۔


متعلقہ خبریں