لاہور: لاہور کی مقامی عدالت نے غیر ملکی ماڈل ٹریزا کو منشیات اسمگلنگ کیس میں 8 سال اور 8 ماہ قید کی سزا سنا دی۔
لاہور کی سیشن عدالت نے منشیات اسمگلنگ میں ملوث چیک ری پبلک کی ماڈل ٹریزا پر ایک لاکھ 13 ہزار 337 روپے کا جرمانہ بھی عائد کیا گیا۔ جرمانہ کی عدم ادائیگی پر ملزمہ کو مزید 8 ماہ 20 دن قید کی سزا کاٹنا ہو گی۔
عدالت نے ٹریزا اسمگلنگ کیس میں شریک ملزم شعیب حفیظ خان کو شک کا فائدہ دیتے ہوئے بری کر دیا جب کہ عدالتی فیصلہ سنتے ہی غیر ملکی ماڈل رو پڑی۔ سماعت کے موقع پر چیک ری پبلک کے سفارتخانے کی ڈپٹی ڈائریکٹر بھی موجود تھیں۔
واضح رہے کہ منشیات اسمگلنگ کیس کا فیصلہ 12 مارچ کو محفوظ کیا گیا تھا۔
غیر ملکی ماڈل ٹریزا کو کسٹم حکام نے 14 جنوری کو علامہ اقبال ائر پورٹ سے گرفتار کر کے 9 کلو ہیروئن برآمد کی تھی۔ ملزمہ کروڑوں روپے مالیت کی ہیروئن آئر لینڈ اسمگل کرنے کی کوشش کر رہی تھی۔
یہ بھی پڑھیں اے این ایف : خاتون سمیت 23 ملزمان گرفتار، کروڑوں کی مشیات برآمد
دورانِ تفتیش ملزمہ نے انکشاف کیا تھا کہ وہ اس سے قبل بھی اسمگلنگ کے لیے پاکستان کا دورہ کر چکی ہے جب کہ اس کی ایک دوست بھی ہیروئن اسمگلنگ میں اس کے ساتھ تھی۔
دوران تفتیش چیک ماڈل نے انکشاف کیا تھا کہ پاکستان میں موجود لوگ بھی اس کی مدد کرتے تھے۔ ملزمہ کے انکشاف پر پاکستان میں موجود چیک ماڈل کے سہولت کار طارق کو پولیس نے گرفتار کیا تھا۔
ملزم طارق نے پولیس کو بتایا تھا کہ ٹریزا نے اس کے بھائی کی دعوت پر پاکستان کا دورہ کیا۔ ماڈل کو30 جنوری 2018 کو مجسٹریٹ ظفر ہاشمی کی عدالت میں پیش کیا گیا تھا جب کہ عدالت نے مختصر سماعت کے بعد ملزمہ کو جوڈیشل ریمانڈ پر کورٹ لکھپت جیل بھیج دیا تھا۔
خیال رہے کہ گرفتاری کے وقت ماڈل ٹریزا کے ساتھ ائرپورٹ پرسیکیورٹی افسران کی تصاویر وائرل ہوئی تھیں اورپاکستان میں سوشل میڈیا پر ان کے تذکرے کئی دنوں تک ہوتے رہے تھے۔
