مہنگائی کے سونامی نے اب اتوار بازاروں کا رخ کر لیا


ملک میں موجود مہنگائی کے سونامی نے اب اتوار بازاروں کا بھی رخ کر لیا ہے، پچھلے ہفتے کے مقابلے میں اشیاء خورونوش کے نرخ میں پانچ سے دس فیصد تک اضافہ کر دیا گیا ہے۔

ذرائع کے مطابق ملک بھر کے اتوار بازاروں میں اشیاء خوردونوش کی قیمتوں میں اضافہ دیکھا جا رہا ہے، پھلوں میں سیب کی قیمت 135 روپے فی کلو سے بڑھ کر 140 روپے کر دی گئی ہے۔

دیگر پھلوں اور سبزیوں کے نرخوں میں بھی اضافہ کر دیا گیا ہے،خربوزہ 60 روپے فی کلو سے بڑھ کر 70 روپے ،آلو 28 روپے فی کلو سے بڑھ کر 32 روپے جبکہ ادرک 190 روپے فلی کلو تک فروخت ہو رہا ہے۔

یاد رہے گزشتہ روز ہم نیوز کی ایک رپورٹ کے مطابق ملک بھر کی طرح لاہور میں بھی اشیائے خورونوش کی قیمتوں میں ہوش ربا اضافہ ہوگیا ہے ۔

دکانوں پر دال ماش 35 روپے فی کلو، دال مونگ اور دال چنا 20 روپے فی کلو تک مہنگی ہوگئی، چاول کی قیمت میں 30 سے 60 روپے فی کلو تک اضافہ ہوگیا، تیل اور گھی کی قیمتوں میں بھی 7 روپے تک اضافہ، پیکنگ اور ڈبے والے دودھ کی قیمت میں 10 روپے تک اضافہ ہوگیا ،دکاندار اور عوام بڑھتی قیمتوں پر سراپا احتجاج ہیں۔

یہ بھی پڑھیے :پاکستان میں مہنگائی پانچ سال کی بلند ترین سطح پر پہنچ گئی

ہم نیوز کی خبر کے مطابق پاکستان شماریات بیورو نے یکم اپریل کو سبزیوں، دالوں اور گوشت کے نرخوں سے متعلق رپورٹ میں بتایا کہ سالانہ کی بنیاد پر سبز مرچیں 151 فیصد، ٹماٹر 315 فیصد اور سرخ مرچیں 27.6 فیصد مہنگی ہوئیں جبکہ دال کی قیمتوں میں ایک سال کے دوران 22.7 اور گوشت کی قیمتیں 13.8 فیصد بڑھیں۔

ماہانہ کی بنیاد پر پیاز 39.2 فیصد، کینو 22.3 فیصد، ٹماٹر کی قیمت میں ایک ماہ میں 18.8 فیصد، کیلا 15 فیصد جبکہ دال مونگ کی قیمت ایک ماہ کے دوران 12.6 فیصد اور لہسن 11 فیصد مہنگا ہوا۔

پاکستان شماریات بیورو کے مطابق کتابوں کی قیمتیں 31.3 اور ٹیوشن فیس میں 27.7 فیصد اضافہ ہوا جبکہ سیمنٹ کی قیمتیں ایک سال کے دوران 13.9 فیصد بڑھ گئیں۔


متعلقہ خبریں