اسلام آباد: وفاقی وزیر سائنس و ٹیکنالوجی فواد چودھری نے دعویٰ کیا کہ انشااللہ آئندہ چند ماہ بعد عوام تمام ادائیگیاں موبائل فون کے ذریعے کریں گے جس میں بس کے کرائے سے لے کر گاڑی خریدنے تک کا عمل شامل ہے۔
ہم نیوز کے مطابق وفاقی وزیر نے یہ دعویٰ سماجی رابطے کی ویب سائٹ ’ٹوئٹر‘ پر جاری کردہ اپنے ایک پیغام میں کیا ہے۔
فواد چودھری نے کہا کہ قمری کیلنڈر کے بعد اگلا بڑا چیلنج موبائل فون کو کریڈٹ کارڈ اور ڈیبٹ کارڈ کے متبادل کے طور پر متعارف کرانا ہے۔
وفاقی وزیر سائنس و ٹیکنالوجی نے سماجی رابطے کی ویب سائٹ پر جاری کردہ پیغام میں واضح کیا کہ ٹیکنالوجی کی ترقی کے لیے ادائیگیوں کا آسان ہونا لازمی ہے۔
قمری کیلنڈر کے بعد اگلا بڑا چیلنج کریڈٹ کارڈ اور ڈیبٹ کارڈز کو موبائل فون پیمنٹ سے replace کرنا ہے، ٹیکنالوجی کی ترقی کیلئے ادائیگیوں (payments) کا آسان ہونا لازمی ہے، انشااللہٰ چند مہینوں میں آپ کی تمام ادائیگیاں بس کے کرائے سے گاڑی خریدنے تک موبائل سے ہوں گی۔
— Ch Fawad Hussain (@fawadchaudhry) May 27, 2019
وفاقی وزیر سائنس و ٹیکنالوجی نے رمضان المبارک میں عیدین اور دیگر اسلامی ایام میں چاند کی رویت دیکھنے کے عمل کو آسان بنانے کے لیے قمری کلینڈر لانے کا اعلان کیا تھا۔
انہوں نے اپنے دعوے کے عین مطابق گزشتہ روز قمری کیلنڈر متعارف کراتے ہوئے آئندہ پانچ سال تک کی عیدوں کے ایام کا اعلان بھی کردیا۔
انہوں نے گزشتہ روز ہی چاند دیکھنے سے متعلق ویب سائٹ کا افتتاح کیا جس کے بعد انہوں نے بتایا کہ آئندہ پانچ سال کے لیے قمری کلینڈر ترتیب دیتے ہوئے منظوری کے لیے اسلامی نظریاتی کونسل بھجوا دیا گیا ہے۔
