ورلڈ کپ ۔۔۔ جب یہ لفظ میرے جیسے شائقین کرکٹ کی سماعتوں سے ٹکراتا ہے تو ایک عجیب سی کیفیت طاری ہوجاتی ہے، حالانکہ میرا براہ راست تعلق فیلڈ میں کھیلنے والے ان گیارہ خوش نصیب کھلاڑیوں کے ساتھ تو ہرگز نہیں ہے مگر ایک وابستگی ضرور ہے جو کہیں نہ کہیں مجھے اس کھیل کو دیکھنے پر مجبور کر دیتی ہے۔ جہاں مجھ جیسے معمولی کرکٹ فین کا حال آپ کے سامنے ہے تو سوچئے ان کھلاڑیوں کا احوال کیا ہو گا جو اس میگا ایونٹ میں شریک ہیں؟
ویسے تو ورلڈ کپ کھیلنا ہر کھلاڑی کا خواب ہوتا ہے اور اگر وہ گوروں کے دیس میں ہو تو اس خواب کو حقیقت میں بدلنا چیلنج کی صورت اختیار کر جاتا ہے،قومی ٹیم کے کھلاڑی بھی آج کل اس خواب کو پورا کرنے کی تگ و دو میں ہیں ۔
ورلڈ کپ تاریخ کے آئینے میں
اب تک کے کھیلے گئے گیارہ میگا ایونٹس پر نظر دوڑائی جائے تو پاکستان کی کارکردگی ملی جلی رہی ہے،قومی ٹیم موجوہ وزیراعظم عمران خان جو پاکستان کرکٹ ٹیم کے مایہ ناز کپتان بھی رہے ہیں ‘کی قیادت میں انیس سو بانوے میں دنیا کی چمپئن ٹیم بنی لیکن باقی دس ورلڈکپ میں پاکستانی ٹیم کا سفر متاثر کن نہ رہا ۔
ورلڈ کپ کے پہلے تین ایڈیشنز کا انعقاد انگلینڈ میں ہوا،انیس سو پچھتر میں کھیلے گئے پہلے ورلڈ کپ میں ویسٹ انڈیز چمپئن بنا ۔
یہ ورلڈ کپ اس لحاظ سے بھی منفرد تھا کہ اس میں ساٹھ اوورز پر مشتمل ایک اننگز کھیلی جاتی تھی اور اس میں پہلی اور آخری مرتبہ ایسٹ افریقہ کی ٹیم نے شرکت کی،پہلے ورلڈ کپ میں گرین شرٹس کا نمبر پانچواں رہا ۔
انیس سو اناسی کے دوسرے ورلڈ کپ میں پاکستان کی کارکردگی قدرے بہتر رہی اور قومی ٹیم نے سیمی فائنل تک رسائی حاصل کی جہاں ویسٹ انڈیز کی ٹیم راہ میں رکاوٹ بن گئی۔
دو سو ترانوے رنز کے بڑے ہدف کے جواب میں گرین شرٹس اڑھائی سو رنز بنا سکی ۔ ویسٹ انڈیز نے فائنل میں انگلینڈ کو ہرا کر دوسری مرتبہ ورلڈ کپ جیتنے کا اعزاز حاصل کیا۔
انیس سو تراسی کے ورلڈکپ میں پہلی دفعہ فیلڈنگ رسٹرکشن کا قانون لاگو کیا گیا،عالمی کپ گرین شرٹس کے لیے ہو بہو انیس سو اناسی جیسا ہی رہا ۔ میدان بھی اوول کا اور حریف ٹیم بھی ویسٹ انڈیز جو اس دور میں کالی آندھی کے نام سے جانی جاتی تھی،گرین شرٹس کے حوصلے تو بلند تھے لیکن کیئربین باؤلرز کی برق رفتار گیندوں نے پاکستانی بلے بازوں کی ایک نہ چلنے دی اور قومی ٹیم کو فائنل کی دوڑ سے آوٹ کر ڈالا۔
شاہینوں نے پہلے کھیلتے ہوئے صرف ایک سو چوراسی رنز بنائے جواب میں ویسٹ انڈیز کی ٹیم نے باآسانی ہدف دو وکٹوں کے نقصان پر پورا کرلیا، لیکن فائنل میں بھارت نے اپ سیٹ شکست دے کر ویسٹ انڈیز کے مسلسل تین بار چمپئین بننے کا خواب چکنا چور کر دیا۔
ورلڈ کپ انیس سو ستاسی سے آغاز ہوا ففٹی اوور کرکٹ کا ۔ یہ میگا ایونٹ اس لحاظ سے منفرد تھا کہ یہ پہلی مرتبہ پاکستان اور بھارت میں مشترکہ طور پر کھیلا گیا، کیونکہ اس سے پہلے تمام عالمی کپ برطانیہ میں ہی کھیلے گئے تھے۔
اس ایونٹ میں بھی قومی ٹیم سیمی فائنل تک پہنچنے میں کامیاب رہی ، قذافی اسٹیڈیم میں آسٹریلیا نے قومی ٹیم کو اٹھارہ رنز سے شکست دے کر ایک بار پھرشاہینوں کے فائنل میں جانے کا سپنا سچ نہ ہونے دیا۔
انیس سو بانوے میں سفر شروع ہوا قومی ٹیم کے چمپئن ٹیم بننے کا۔ اس خواب کا جسے حقیقت میں بدلا عمران خان کی قیادت میں ان پندرہ کھلاڑیوں نے جن میں سے چند کوچ بن گئے، کوئی بنا سلیکٹر اور کچھ کرکٹ ایکسپرٹ بنے بیٹھے ہیں ۔
انیس سو بانوے کا ورلڈکپ اس اعتبار سے بھی یکسر مختلف تھا کیونکہ اس میں کلر کٹ متعارف کرائی گئی۔ وائٹ (سفید) بال اور بلیک (کالی) سائیڈ سکرین کا استعمال بھی یہیں سے شروع ہوا جو اب بھی جاری ہے ۔
اس ورلڈکپ میں پاکستان کا آغاز تو اچھا نہ رہا ۔ پاکستانی ٹیم پہلے پانچ میچوں میں صرف ایک میں فتح سمیٹ سکی جن میں سے ایک میچ خوش قسمتی سے بارش کی نذر ہوگیا ۔
انگلینڈ کیخلاف اس میچ میں قومی ٹیم چوہتر رنزبنا کر ڈھیر ہوگئی تھی مگر ابررحمت نے پاکستان کو بچالیا اور ایک قیمتی پوائنٹ مل گیا۔
آخری تین میچوں میں آسٹریلیا ۔ سری لنکا اورنیوزی لینڈ کو شکست دیکر قومی ٹیم سیمی فائنل تک پہنچنے میں کامیاب ہوئی ، پھر نیوزی لینڈ کو سیمی فائنل اور انگلینڈ کو بائیس رنز سے ہراکر قومی ٹیم نے پہلی مرتبہ ورلڈچمپئین بننے کا اعزاز حاصل کیا۔
انیس سو چھیانوے کا ورلڈ کپ جنوبی ایشیاء میں منعقد ہوا۔ اس ورلڈکپ میں قومی کرکٹ ٹیم فیورٹ گردانی جاتی تھی کیونکہ ایک تو ورلڈکپ پاکستان اور بھارت میں مشترکہ طور پر کھیلا جا رہا تھا اور دوسرا پاکستان کا کمبنیشن بہت اچھا تھا مگر روایتی حریف بھارت کیخلاف کوارٹر فائنل میں اچانک کپتان وسیم اکرم کی انجری نے میچ کا پانسہ ہی پلٹ دیا۔
عامر سہیل کی قیادت میں ٹیم میدان میں اتری تو بھارت نے دو سو ستاسی رنز کا بڑا ہدف دے دیا۔ جواب میں پاکستانی اوپنرز نے اننگ کا آغاز دھویں دار انداز میں کیا، پندرہ اورز کے اندر ہی قومی ٹیم نے سو رنز بھی اسکور کر لیے مگر عامر سہیل کی وکٹ گرنے کے بعد میچ کا نقشہ ہی بدل گیا اور قومی ٹیم پھر سنبھل نہ پائی۔ مقررہ انچاس اورز میں دو سو اڑتالیس رنز ہی بنا سکی۔
انیس سو ننانوے کے کرکٹ ورلڈکپ کا سفر قومی ٹیم کو فائنل تک لے گیا ،کرکٹ کے بڑے بھی اس وقت کی پاکستانی ٹیم کو اب تک کی مضبوط ترین ٹیم گردانتے ہیں مگر لارڈز کا وہ فائنل پاکستان کے لے تلخ یادوں کے سوا اور کچھ نہیں ۔ راؤنڈ کے میچ میں آسٹریلیا کو شکست دینے والی ٹیم فائنل معرکہ میں تاش کے پتوں کی طرح بکھر گئی۔
موسمی صورتحال میں کپتان وسیم اکرم کے پہلے بیٹنگ کے غلط فیصلے نے ٹیم کو شکست کے دہانے پر پہنچا دیا ۔ گرین شرٹس پہلے کھیلتے ہوئے صرف ایک سو بتیس رنز ہی بنا نے میں کامیاب ہوئی۔جواب میں آسٹریلوی ٹیم نے باآسانی ہدف بیس اورز میں دو وکٹوں کی نقصان پر پورا کر کے دوسری مرتبہ ورلڈ چمپئن کا تاج اپنے سر سجا لیا۔
دو ہزار تین کا ورلڈ کپ جنوبی افریقہ میں کھیلا گیا اس مرتبہ چودہ ٹیموں نے حصہ لیا۔ اس میگا ایونٹ میں گرین شرٹس کا سفر بھیانک خواب ثابت ہوا۔ قومی ٹیم گروپ اسٹیج میں ہی ٹورنامنٹ سے باہر ہو گئی، وقاریونس کی کپتانی میں ٹیم صرف دو میچ ہی جیت سکی۔بھارت کیخلاف میچ میں ٹیم دو سو تہتر رنز بنا کر بھی فتح نہ سمیٹ سکی۔
ویسٹ انڈیز میں کھیلے گئے دو ہزار سات کے ورلڈکپ کی کہانی بھی پاکستانی ٹیم کے لیے دو ہزار تین جیسی ہی رہی۔ قومی ٹیم یہاں بھی گروپ اسٹیج سے آگے نہ بڑھی۔ انضمام الحق کی قیادت میں قومی ٹیم آئرلینڈ سےاپ سیٹ شکست کھانے کے بعد اپنے کوچ باب وولمر سے بھی محروم ہو گئی۔
سابق ہیڈ کوچ کے لئے ہار کا صدمہ اس قدر گہرا تھا کہ وہ دل کا دورہ پڑنے سے اپنی زندگی ہی گنوا بیٹھے۔۔یہ ورلڈکپ انضمام الحق کا آخری ورلڈ کپ بھی تھا انہوں نے زمبابوے کیخلاف میچ کھیل کر ون ڈے کرکٹ کو خیرباد کہہ دیا۔
دوہزارگیارہ کا میگا ایونٹ ایک بار پھر جنوبی ایشیا میں کھیلا گیا جس میں پاکستان کی ٹیم شاہد آفریدی کی قیادت میں سیمی فائنل تک پہنچنے میں کامیاب ہوئی مگر بھارت پھر آڑے آ گیا۔ یہاں بھی قومی ٹیم بھارت کیخلاف ورلڈکپ میں جیت کا کھاتہ کھولنے میں کامیاب نہ ہوئی۔ دو سوساٹھ رنز کے تعاقب میں قومی ٹیم دوسواکتیس رنز ہی بنا سکی اور یوں فائنل کی دوڑ سے باہر ہو گئی۔
دو ہزارپندرہ کا ورلڈکپ آسٹریلیا اور نیوزی لینڈ میں کھیلا گیا۔مصباح الحق کی قیادت میں قومی ٹیم کواٹر فائنل تک پہنچی جہاں آسٹریلیا نے پاکستان کا راستہ روک لیا۔
وہاب ریاض کی تباہ کن باؤلنگ بھی پاکستان کے کام نہ آئی ۔قومی ٹیم ناقص فیلڈنگ اور بیٹنگ کے باعث میچ ہار گئی۔پہلے کھیلتے ہوئے قومی ٹیم نے دو سو تیرہ رنز بنائے جو آسٹریلوی ٹیم نے تینتسویں اوور میں چار وکٹوں کے نقصان پر پورا کر لیا۔
ورلڈ کپ 2019اور پاکستان ٹیم سے توقعات
اب دو ہزار انیس کا ورلڈ کپ بھی گوروں کے دیس برطانیہ میں ہورہا ہے۔ اس میگا ایونٹ میں ٹاپ ٹین ٹیمیں آمنے سامنےہیں۔ اس ٹورنامنٹ میں انگلینڈ کو ہاٹ فیورٹ قرار دیا گیا ہے۔
بھارت اورآسٹریلیا بھی ورلڈکپ جیتنے کے لیے فیورٹ ہیں ۔کرکٹ ماہرین نے پاکستان کو بھی چند اعتبار سے ٹاپ فور میں جگہ بنانے والی ٹیموں میں شمار کیا ہے۔
پاکستانی ٹیم کپتان سرفراز احمد کی سربراہی میں میدان میں اترے گی۔ ٹیم کی حالیہ فارم دیکھی جائے تو وہ مایوس کن رہی ہے ۔ گرین شرٹس کو آخری دس میچوں میں شکست کا سامنا کرنا پڑا۔
انگلینڈ کیخلاف حالیہ ون ڈے سیریز میں قومی ٹیم کو چار صفر سے شکست کا منہ دیکھنا پڑا۔ گوکہ اس سیریز میں پاکستان نے لگاتار تین مرتبہ ساڑھے تین سو رنز سکور کیے لیکن بدقسمتی سے ہار مقدر ٹھری۔
مسلسل شکستوں کے بعد قومی ٹیم میں چند اہم تبدیلیاں کی گئیں۔ مایہ ناز فاسٹ باؤلر محمد عامر،وہاب ریاض،جارحانہ بلے بازآصف علی اورلیگ سپنر شاداب خان کو پندرہ رکنی سکواڈ میں آخری لمحات میں شامل کیا گیا جس سے ٹیم کمبینیشن کافی حد تک بہتر ہوا ہے ۔
اب جیت پاکستان کے قدم چومے گی یا ایک بار پھر پاکستان کو خالی ہاتھ ہی وطن واپس لوٹنا پڑیگا یہ وقت ہی بتائے گامگر پاکستان کی برطانیہ کی ہی سرزمین پر فتوحات کو نظر انداز نہیں کیا جاسکتا جس کا ذکر بھارتی سابق کپتان سارو گنگولی بھی کر چکے ہیں۔ گرین شرٹس نے انیس سو ننانوے کے ورلڈکپ میں فائنل تک رسائی حاصل کی، پھر دوہزار نو میں ٹی ٹونٹی چمپئن بننے اور حال ہی میں آئی سی سی چیمپئنز ٹرافی اپنے نام کر کے سب کو حیران کر دیا۔ ایسے ہی تو نہیں کسی نے قومی ٹیم کو ماسٹرز آف لیٹ ٹوئسٹ اور ان پریڈیکٹیبلز کا لقب دیا؟
توپھر چودہ جولائی تک کا انتظاراس دعا کے ساتھ کریں کہ سرفراز اور اس کے پندرہ کھلاڑی سرخرو ہو کر وطن واپس پہنچیں ۔
