سنگین غداری کیس:التوا کیلئے دی گئی مشرف کی درخواست مسترد

پرویز مشرف کی سزا معطلی کا فیصلہ سپریم کورٹ میں چیلنج

فوٹو: فائل


اسلام آباد: سابق صدر پرویز مشرف کے خلاف سنگین غداری کیس کی سماعت کرنے والی خصوصی عدالت نے ملزم کی التوا کی درخواست پر محفوظ فیصلہ سناتے ہوئے درخواست مسترد کردی ہے۔

4صفحات پر مشتمل فیصلہ خصوصی عدالت کے  رجسٹرار راؤ جبار نے پڑھ کر سنایا۔ عدالت نے پرویز مشرف کے وکیل کی طرف سے کئی گئی التوا کی درخواست مسترد کردی۔

عدالت نے اپنے فیصلے میں کہا ہے کہ ملز م خرابی صحت کے باعث پیش نہیں ہو پارہا،پرویز مشرف کے وکیل نے طبی بنیادوں پر التوا کی درخواست کی۔ سپریم کورٹ کے حکم کیمطابق مزید التوا نہیں دے سکتے۔ پرویز مشرف دفاع کا حق کھو چکے ہیں۔

سپریم کورٹ کے احکامات پر عمل در آمد کیا جائیگا۔ملزم پیش نہیں ہوتا تو کیس ختم کرنے کی درخواست کو ناقابل سماعت سمجھتے ہیں۔

عدالت نے کہا وزارت قانون وکلا کاایک پینل بنائے جو ملزم کا عدالت میں دفاع کرے۔وزارت قانون ان وکلا کی فیس کے شیڈول کے بارے میں رپورٹ  بھی پیش کرے۔ آئندہ سماعت 27 جون کو ہوگی۔

جسٹس طاہرہ صفدر کی سربراہی میں تین رکنی خصوصی عدالت  نے سنگین غداری کیس کی سماعت کی۔

پرویز مشرف کے وکیل سلمان صفدر نے آج سماعت کے آغاز ہی میں کیس کے التوا کیلئے ایک اور درخواست جمع کرادی۔

پرویز مشرف کے وکیل نے عدالت میں موقف اختیار کیا کہ ہر بار سماعت کے دوران کیس کی التوا کی درخواست پر شرمندگی ہوتی ہے۔سابق صدر کا وزن تیزی سے کم ہو رہا ہے،مشرف وہیل چیئر پر ہیں، وہ چل پھر نہیں سکتے۔

سلمان صفدر نے عدالت سے استدعا کی کہ پرویز مشرف کو ایک موقعہ اور دیا جائے تاکہ وہ خود عدالت میں پیش ہو سکیں۔مشرف کے دل کی کیموتھراپی ہو رہی ہے،اس کیموتھراپی کے بعد صحت خراب ہوتی ہے۔

جسٹس طاہرہ صفدر نے ریمارکس دیے کہ سپریم کورٹ نے اس معاملے پر حکم جاری کررکھا ہے۔

پرویز مشرف کے وکیل نے جواب دیا کہ وہ عدالتی حکم سے آگاہ ہیں۔ انسانی بنیادپر ایک اور درخواست کررہے ہیں۔

استغاثہ کے وکیل ڈاکٹر طارق حسن نے پرویز مشرف کی صحت کے حوالے سے اپنے دلائل دیے جس پر جسٹس طاہرہ صفدر نے کہا کیا آپ اس (مشرف) کی جسمانی صحت کے خلاف بات کررہے ہیں؟

جسٹس نذر اکبر نے استفسار کیا کہ کیاپرویز مشرف کی صحت کی تصدیق کرانا چاہتے ہیں۔

استغاثہ کے وکیل نے کہا کہ وہ  ایسا نہیں چاہتے ۔ عدالت نے پرویز مشرف کا بیان ویڈیو لنک کے ذریعے کرنے کا موقعہ دیا۔

جسٹس شاہد کریم نے کہا دیکھنا یہ ہے کہ آج کی سماعت ملتوی کرنے کی درخواست منظور کی جائے یا نہ؟

استغاثہ کے وکیل نے کہا کہ ہم فریق مخالف کے رویے کو اپوز کرتے ہیں۔

یہ بھی پڑھیے: سنگین غداری کیس، مشرف 13 مئی کو عدالت آنے پر رضا مند

عدالت نے پرویز مشرف کی التوا کی درخواست پر فیصلہ محفوظ کرلیا جو کچھ دیر کے بعد سنایا جائیگا۔


متعلقہ خبریں