اسلام آباد:متحدہ قومی موومنٹ (ایم کیوایم)پاکستان کی اپوزیشن جماعتوں سے قربت رنگ لے آئی ہے،وفاقی حکومت نے ایم کیو ایم کو مزید ایک وزارت دینے کا فیصلہ کرلیاہے۔
ذرائع نے ہم نیوز کو بتایا ہے کہ ایم کیو ایم کے رکن قومی اسمبلی سید امین الحق کو کابینہ میں شامل کرنے کا فیصلہ کرلیا گیاہے۔ فیصلہ وزیر اعظم عمران خان سے گورنر سندھ اور وفاقی وزیر برائے قانون فروغ نسیم کی ملاقات کے بعد کیا گیا ہے۔
ذرائع کے مطابق امین الحق کو ہاؤسنگ کی وزارت دئے جانے کا امکان ہے۔
وزیرِ اعظم عمران خان سے گورنر سندھ عمران اسمعیل اور وفاقی وزیر قانون ڈاکٹر فروغ نسیم کی وزیرِ اعظم آفس میں ملاقات گزشتہ رات ہوئی ۔ملاقات میں ایم کیو ایم کو ایک اور وزارت دینے پر اتفاق کے ساتھ ساتھ میئر کراچی اور میئر حیدرآباد کو مالی پیکیج دینے پر بھی اتفاق کیا گیا۔
ذرائع کا کہناہے کہ وزیرِ اعظم عمران خان نے وفاقی وزیرِ قانون فروغ نسیم اور گورنر سندھ عمران اسماعیل پر مشتمل کمیٹی کو ٹاسک دے دیا ہے۔
اس حوالے سے قائم کی گئی کمیٹی دو دن میں طریقہ کار وضع کرکے وزیرِ اعظم کو اپنی سفارشات پیش کرے گی۔
وزیرِ اعظم عمران خان نے اس ملاقات کے دوران میئر کراچی اور میئر حیدر آباد کو بااختیار بنانے کی ضرورت پر زور دیا۔
یہ بھی پڑھیے: وزیراعظم کی ایم کیوایم کی تعریف،بلاول ، مولانا فضل الرحمان پر تنقید
وزیرِ اعظم نے جمہوری عمل میں ایم کیو ایم کے مثبت کردار کو سراہتے ہوئے کہا کہ کراچی ملک کی ترقی میں اہم کردار ادا کرتا ہے اسے نظر انداز نہیں کیا جا سکتا۔
