راولپنڈی: آرمی چیف جنرل قمر جاوید باجوہ برطانیہ کے سرکاری دورے پر لندن پہنچ گئے۔
پاک فوج کے شعبہ تعلقات عامہ (آئی ایس پی آر) کے ڈائریکٹر جنرل (ڈی جی) میجر جنرل آصف غفور نے سماجی رابطہ کی ویب سائٹ ٹوئٹر پر آرمی چیف کے لندن پہنچنے سے متعلق آگاہ کیا۔
COAS arrived at London, UK on official visit. Will interact with senior British Civil-Military leadership to discuss matters of mutual interest including evolving geo-strategic environment, defence and security.
— Maj Gen Asif Ghafoor (@OfficialDGISPR) June 20, 2019
انہوں نے کہا کہ آرمی چیف اپنے دورے کے دوران برطانیہ کی فوجی قیادت سے ملاقاتیں کریں گے جس میں باہمی دلچسپی کے امور، دفاع اور سیکیورٹی کے معاملات پر تبادلہ خیال کیا جائے گا۔
یہ بھی پڑھیں چیلنجز سے نمٹنے کے لیے مؤثر حکمت عملی ضروری ہے، آرمی چیف
گزشتہ روز پاک فوج کے سربراہ سے عراق کے قائم مقام سیکرٹری دفاع لیفٹیننٹ جنرل اسٹاف پائلٹ محمد سلیم الراجی نے جی ایچ کیو میں ملاقات کی تھی جس میں پیشہ وارانہ دلچسپی اور خطے کی سلامتی سے متعلق امور زیر بحث آئے تھے۔
ملاقات میں آرمی چیف کا کہنا تھا کہ عراق کو ترقی اور دفاع کے لیے اپنا تعاون فراہم کرنا ہمارے لیے باعث فخر ہو گا اور عراق میں سیکیورٹی صورت حال بہتر بنانے کے لیے تعاون میں ہمیں خوشی محسوس ہو گی۔ پاکستان عراق سے اپنے برادرانہ تعلقات کو اہمیت دیتا ہے۔
تین روز قبل بھی آرمی چیف سے چین کی پیپلز لبریشن آرمی کے کمانڈر جنرل ہین نے جی ایچ کیو میں ملاقات کی تھی جس میں خطے کی سیکیورٹی صورتحال اور باہمی دلچسپی کے امور پر تبادلہ خیال کیا گیا تھا۔
