واشنگٹن: امریکہ کے سیکریٹری خارجہ مائک پومپیو نے واضح کیا ہے کہ خلیج میں اپنے اسٹریٹجک اتحادیوں کے تحفظ کو امریکہ یقینی بنائے گا۔ انہوں نے کہا کہ مشرق وسطیٰ میں سعودی عرب اور متحدہ عرب امارات کا دورہ خطے میں امریکی دوستوں کے درمیان تزویراتی اتحاد کا ثبوت ہو گا۔
عالمی خبررساں ایجنسی کے مطابق واشنگٹن سے روانگی سے قبل ذرائع ابلاغ سے بات چیت میں انہوں نے کہا کہ سعودی عرب اور متحدہ عرب امارات کی قیادتوں سے ملاقات کے دوران ہم ایران کے معاملے پر اپنی صفوں میں اتحاد پیدا کرنے اوریکساں مؤقف اپنانے پر گفتگو کریں گے۔
امریکی خفیہ ایجنسی ’سی آئی اے‘ کے سربراہ رہ چکنے والے مائک پومپیو نے کہا کہ ایران کے خلاف عالمی اتحاد تشکیل دینے کی تجویز پر بھی تبادلہ خیال ہوگا۔
ذرائع ابلاغ کی جانب سے پوچھے جانے والے ایک سوال کے جواب میں امریکی سیکریٹری خارجہ کا کہنا تھا کہ واشنگٹن، ایران کے ساتھ غیر مشروط بات چیت کے لیے تیار ہے۔ انہوں نے واضح طور پر کہا کہ ایرانی بخوبی جانتے ہیں کہ وہ ہم سے کہاں مل سکتے ہیں؟
مائک پومپیو نے کہا کہ اگر ایران بات چیت کے لیے تیار ہو تو ہم با مقصد مذاکرات شروع کرنے کی بھرپور صلاحیت رکھتے ہیں۔
عالمی ذرائع ابلاغ کے مطابق امریکی سیکریٹری خارجہ سعودی عرب اور متحدہ عرب امارات کے دورے سے قبل بھارت کا سرکاری دورہ کریں گے۔
I’m heading out today. Our first stops will be in the Kingdom of Saudi Arabia & the UAE, two great allies in the challenge that Iran presents, and we’ll be talking with them about how to make sure that we are all strategically aligned and how we can build out a global coalition. pic.twitter.com/txu0pA2xr4
— Secretary Pompeo (@SecPompeo) June 24, 2019
غیر ملکی دورے پر روانگی سے دو دن قبل مائک پومپیو نے کہا تھا کہ امریکہ ایران پر اقتصادی دباؤ بڑھاتا رہے گا تاکہ وہ پرتشدد کارروائیوں کا سلسلہ ترک کرے اور سفارتکاری کا راستہ اپنائے ۔ گزشتہ روز انہوں نے واضح کیا تھا کہ وقت آنے پر ہم ایرانیوں کے ساتھ رابطہ کریں گے۔
امریکہ کے صدر ڈونلڈ ٹرمپ نے ایران کے خلاف مزید اقتصادی پابندیاں عائد کرنے کا اعلان کررکھا ہے۔
