خطے میں استحکام کے لیے پاکستان کا کردار نہایت اہم ہے، پومپیو

June 26, 2019
ویب ڈیسک
خطے میں استحکام کے لیے پاکستان کا کردار نہایت اہم ہے، پومپیو

کابل: امریکہ کے سیکریٹری خارجہ مائک پومپیو نے کہا ہے کہ افغانستان میں قیام امن اور خطے میں استحکام کے حوالے سے پاکستان کا نہایت اہم کردار ہے۔ انہوں نے اعتراف کیا کہ اس ضمن میں پیشرفت ہوئی بھی ہے۔ ان کا کہنا تھا کہ ہم پاکستان کی جانب سے مزید عملی اقدامات اور تعاون سمیت کسی بھی قسم کے معاہدے پر عمل درآمد کے خواہاں ہیں۔

افغانستان کے نشریاتی ادارے ’طلوع نیوز‘ کے مطابق اچانک دورہ افغانستان میں وہ ذرائع ابلاغ  سے بات چیت کررہے تھے۔

امریکہ کے سیکریٹری خارجہ تین روزہ دورے پر بھارت پہنچے ہیں۔ اس سے قبل انہوں نے سعودی عرب اور متحدہ عرب امارات کے دورے کیے ہیں۔

مائک پومپیو نے واضح کیا کہ امریکہ، افغانستان سے اپنی افواج نکالنے کو تیار ہے، اس کے متعلق طالبان کو بھی بتا دیا ہے لیکن فی الحال کوئی حتمی تاریخ نہیں دے سکتے ہیں۔

امریکہ کے سیکریٹری خارجہ نے اس توقع کا اظہار کیا کہ افغانستان میں قیام امن کا معاہدہ یکم ستمبر تک پایہ تکمیل کو پہنچ جائے گا۔ ان کا کہنا تھا کہ ہم اس سمت میں مثبت پیش رفت کررہے ہیں کہ صدارتی انتخابات سے قبل امن معاہدہ طے پا جائے۔ انہوں نے قیام امن کے معاہدے کو اپنا مقصد بھی قرار دیا۔

افغانستان میں طے شدہ شیڈول کے مطابق 28 ستمبر2019  کو صدارتی انتخابات منعقد ہوں گے جو کچھ عرصہ قبل ملتوی کردیے گئے تھے۔

ذرائع ابلاغ سے بات چیت میں مائک پومپیو نے کہا کہ دورہ افغانستان میں انہوں نے صدر اشرف غنی اور چیف ایگزیکٹو عبداللہ عبداللہ سمیت دیگر اہم رہنماؤں سے ملاقات کی ہے جس میں ہونے والے مذاکراتی عمل پر تبادلہ خیال کیا گیا ہے۔

 

امریکہ کے سیکریٹری خارجہ کا کہنا تھا کہ اشرف غنی اور عبداللہ عبداللہ نے اس امر پر اتفاق کیا ہے کہ ملک میں قیام امن ان کی اولین ترجیح ہے اور وہ ہر قیمت پر اس بات کو یقینی بنائیں گے کہ آئندہ افغانستان کی سرزمین بین الاقوامی دہشت گردی کے لیے استعمال نہ ہو۔

ان کا کہنا تھا کہ ایک جانب افغان طالبان سے قیام امن کے لیے مذاکرات جاری ہیں تو دوسری جانب افغان حکومت سے بھی بات چیت کا عمل رکا نہیں ہے کیونکہ ہم دونوں عمل کو ایک جیسی اہمیت دے رہے ہیں۔ انہوں نے واضح کیا کہ امریکہ افغانسان کو بھولا نہیں ہے۔

امریکہ کے سیکریٹری خارجہ مائک پومپیو کا کہنا تھا کہ افغانستان میں قیام امن کے لیے جرمنی کی کوششوں کا بھی خیرمقدم کرتے ہیں۔

امریکہ کے سیکریٹری خارجہ مائک پومپیو کے اچانک دورہ افغانستان کی اہمیت عالمی سطح پر اس لحاظ سے دیکھی جارہی ہے کہ صدر اشرف غنی کل بروز جمعرات پاکستان کے دورے پر پہنچ رہے ہیں جس میں ان کی وزیراعظم عمران خان سمیت دیگر اعلیٰ حکومتی شخصیات سے بات چیت ہوگی۔


ٹیگز :
متعلقہ خبریں

افغان وزارت خارجہ نے پاکستان کو مذاکرات کی دعوت دے دی

ریڈ کراس، افغانستان کے 25 اسپتالوں کی فنڈنگ بند کرنے کا عندیہ

کسی کو پاکستان کیلئے خطرہ بننے کی اجازت نہیں دیں گے، طالبان