لاہور ہائیکورٹ، یوم آزادی 15 اگست کو منانے کے لیے درخواست دائر

فوٹو: فائل


لاہور: پاکستان کا یوم آزادی 15 اگست کو منانے کے لیے عدالت میں درخواست دائر کر دی گئی۔

لاہور ہائی کورٹ میں درخواست گزار محمد حسنین نے اپنے وکیل شہباز اکمل جندران کے ذریعے درخواست دائر کی۔ جس میں وفاقی حکومت، وزارت داخلہ، ہائر ایجوکیشن کمیشن (ایچ ای سی) اور پنجاب کریکولم بورڈ کو فریق بنایا گیا۔

درخواست میں مؤقف اختیار کیا گیا کہ پاکستان کا یوم آزادی 14 اگست کے بجائے 15 اگست کو منایا جائے کیونکہ آزادی پاکستان کے موقع پر ہونے والے معاہدے میں یہ طے پایا تھا کہ 15 اگست کو پاکستان اور بھارت کے نام سے 2 ریاستیں وجود میں آئیں گی۔

درخواست گزار کا کہنا تھا کہ انڈین انڈیپینڈنٹ ایکٹ 1947 کے مطابق پاکستان کا یوم آزادی 15 اگست ہی ہے لیکن وفاقی حکومت اور وزارت داخلہ سمیت دیگر فریقین قوم کو گمراہ کر رہے ہیں۔

یہ بھی پڑھیں جشن آزادی میں اقلیتوں کی شرکت یقینی بنانے کا فیصلہ

یاد رہے کہ انڈین انڈیپینڈنٹ بل 4 جولائی 1947 کو متعارف کرایا گیا تھا جو 15 جولائی 1947 کو قانون بن گیا تھا۔ جس کے مطابق انڈیا اور پاکستان 14 اور 15 اگست کی درمیانی شب ایک آزاد مملکت کے طور پر وجود میں آئے۔

لاہور ہائی کورٹ میں دائر کردہ درخواست میں استدعا کی گئی کہ حکومت پاکستان کو یوم آزادی 14 اگست کے بجائے 15 اگست کو منانے سے متعلق نوٹیفکیشن جاری کرنے کا حکم دیا جائے۔

واضح رہے کہ اسلامی جمہوریہ پاکستان کے وجود میں آنے کے بعد سے آج تک پاکستان کا یوم آزادی 14 اگست اور بھارت کا یوم آزادی 15 اگست کو منایا جا رہا ہے۔


متعلقہ خبریں