مانچسٹر: ورلڈ کپ کے 34ویں میچ میں بھارت نے ویسٹ انڈیز کو شکست دے کر پوائنٹس ٹیبل پر دوسری پوزیشن حاصل کرلی ہے۔
شکست کے نتیجے میں ویسٹ انڈیز سیمی فائنل کی دوڑ سے مکمل طور پر باہر ہوگئی ہے۔
بھارت نے میچ جیت پر دو پوائنٹس حاصل کرلیے ہیں اور چھ میچز کھیلنے کے بعد اس کے پوائنٹس کی تعداد گیارہ ہوگئی ہے۔
بھارت ورلڈ کپ 2019 میں ناقابل شکست رہنے والی واحد ٹیم ہے۔ پاکستان کرکٹ ٹیم کے شائقین کے لیے بھی یہ نتیجہ مثبت ہے کیوں کہ اس کے نتیجے میں سیمی فائنل کی دوڑ میں شامل ایک اور ٹیم ٹورنامنٹ سے باہر ہوگئی ہے۔
پوائنٹس ٹیبل پر نظر دوڑائیں تو آسٹریلیا کی حکمرانی برقرار ہے اور یہ سیمی فائنل مرحلے کے لیے کوالیفائی کرنے والی پہلی ٹیم بن چکی ہے۔
بھارت بھی اس مرحلے کے لیے کوالیفائی کرنے سے محض ایک پوائنٹ ہی دور رہ گیا اور قوی امکان ہے کہ پڑوسی ملک سیمی فائنل میں پہنچ جائے گا۔
پاکستان سے شکست کے باوجود نیوزی لینڈ کی ٹیم تیسرے جبکہ انگلینڈ کی ٹیم چوتھے نمبر پر ہے تاہم میزبان ملک کو ورلڈ کپ میں اب بقیہ تمام میچز جیتنے ہوں گے۔
اسی طرح بنگلہ دیش کی پانچویں اور پاکستان کی پوائنٹس ٹیبل پر چھٹی پوزیشن ہے۔ لگ ایسا رہا ہے کہ انگلینڈ کی جانب سے میچ ہارنے کی صورت میں ان ہی دونوں ٹیموں میں سے ایک سیمی فائنل کے لیے کوالیفائی کرے گی۔
پاکستان اور بنگلہ دیش پانچ جولائی کو مدمقابل آئیں گے اور ممکن ہے کہ یہ میچ ایک طرح سے کوارٹر فائنل کی حیثیت اختیار کرجائے۔
پوائنٹس ٹیبل پر سری لنکا کی ساتویں پوزیشن ہے تاہم خراب رن ریٹ اور صرف چھ پوائنٹس کی وجہ سے آئر لینڈرز کا آگے کا سفر کافی مشکل ہے۔
ویسٹ انڈیز آٹھویں، جنوبی افریقہ نویں اور افغانستان کی دسویں پوزیشن ہے۔ یہ تمام ٹیمیں عالمی کپ سے باہر ہوچکی ہیں۔
