بھارتی کرکٹ بورڈ (بی سی سی آئی) نے عالمی کپ 2019 میں انگلینڈ کے خلاف میچ کے لئے ٹیم کی نئی کٹ متعارف کروا دی ہے۔
بھارتی کرکٹ بورڈ کے حکام کا کہنا ہے کہ انگلینڈ کی کٹ کا رنگ بھی نیلا ہے اس لئے بھارت کی ’’اوے کٹ‘‘ بنائی گئی جس میں نیلے اور نارنجی رنگ کا استعمال کیا گیا ہے۔
بھارتی ٹیم کپتان نے صحافیوں سے گفتگو کرتے ہوئے کہا کہ مجھے نئی کٹ بہت پسند آئی ہے، دس میں اسے آٹھ نمبر دوں گا۔
ان کا مزید کہنا تھا کہ میرا نہیں خیال یہ کٹ مستقل طور پر شامل کی جا رہی ہے، ہماری ٹیم کا ہمیشہ سے نیلا رنگ رہا جس پر ہمیں فخر ہے۔
اس سے قبل افغانستان نے نیلے رنگ کی کٹ والی ٹیموں کے خلاف سرخ رنگ کی جرسی کا استعمال کیا تھا۔
جنوبی افریقہ کی ٹیم جو زیادہ تر سبز کٹ میں ملبوس ہوتی ہے، نے دو میچز کے دوران سنہرے رنگ کی کٹ زیب تن کی اسی طرح سری لنکا نے بھی پیلے رنگ کی جرسی کا استمعال کیا۔
بتایا گیا ہے کہ بنگلہ دیش پاکستان کے خلاف میچ کے دوران سرخ اور سبز رنگ کی کٹ کا استعمال کرے گی۔
دوسری جانب بھارت کے اندر کٹ کے نئے رنگ کو لے کر اس وقت نیا تنازع کھڑا ہوا جب حزب اختلاف کی جماعتوں نے وزیراعظم نریندر مودی کی دائیں ہاتھ کی انتہا پسند جماعت کو اپنی پارٹی کے جھنڈے کے رنگ کو ٹیم کی کٹ میں شامل کرنے کا الزام عائد کیا۔
