مری کے علاقہ پتریاٹہ میں کیبل کار کا رسہ پلی سے اترنے کا واقعہ پیش آیا ہے جس میں سو کے قریب سیاح پھنس گئے ہیں۔
ذرائع کے مطابق 12 کیبل کاروں سے سیاحوں کو بحفاظت نکالنے کے لئے ریسکیو آپریشن جاری ہے، ابتدائی طور پر 25 افراد کو نکال لیا گیا ہے۔
چیئرلفٹ انچارج نے ہم نیوز کو بتایا ہے کہ ایک کیبل کار میں قریباً 8 سیاح سوار ہیں، بارش تھم چکی ہے، جلد ریسکیو آپریشن مکمل کر لیا جائے گا۔
ان کا مزید کہنا تھا کہ کوشش کر رہے ہیں کہ ایک ایک کیبل کار چلا کر سیاحوں کو نکالا جائے۔
دوسری جانب سی پی او راولپنڈی کے احکامات پر پولیس نے پتریاٹہ چئیر لفٹ مری میں مزید فورس روانہ کر دی ہے جو کہ دیگر ریسکیو اداروں سے مل کر وہاں پھنسے افراد کو ریسیکو کریں گے۔
ترجمان راولپنڈی پولیس نے بتایا کہ سیاحوں کو باحفاظت نکالنے کے لئے تمام تر وسائل بروئے کار لائے جائیں گے۔
