اسلام آباد: مسلم لیگ نون کے رہنما رانا ثنا اللہ کی گرفتاری کی حزب اختلاف کے رہنماؤں نے شدید مذمت کی اور لاقانونیت کی بدترین مثال قرار دیا۔
پاکستان مسلم لیگ کے صدر اور قائد حزب اختلاف شہباز شریف نے کسی مقدمہ اور الزام کے بغیر رانا ثنا اللہ کی گرفتاری کو لاقانونیت اور سیاسی انتقام کی بدترین مثال قرار دیا۔
انہوں نے کہا کہ وزیر اعظم عمران خان کے حکم پر اداروں کو سیاسی مخالفین کے خلاف استعمال کی ایک اور گھناؤنی مثال آج قائم کی گئی۔ کبھی نیب، کبھی نیب ٹو اور کبھی اے این ایف کو سیاسی مخالفین کو گرفتار کرنے اور دباؤ میں لانے کے لیے استعمال کرنا افسوسناک ہے۔
شہباز شریف نے مطالبہ کیا کہ رانا ثنا اللہ کو فوری طور پر مجاز عدالت میں پیش کیا جائے اور بتایا جائے کہ ان پر کیا الزام ہے ؟ رانا ثنا اللہ کی گرفتاری میں عمران خان کا ذاتی عناد کھل کر سامنے آگیا۔
چیئرمین پیپلز پارٹی بلاول بھٹو زرداری نے بھی رانا ثنا اللہ کی گرفتاری کے خلاف سماجی رابطہ کی ویب سائٹ پر اپنے ٹوئٹ میں کہا کہ اے این ایف کا مسلم لیگ پنجاب کے صدر رانا ثنا اللہ کو گرفتار کرنا سیاسی انتقام کی مایوس کن کوشش ہے۔
یہ بھی پڑھیں لوٹوں کے گھروں کا گھیراؤ کریں گے، رانا ثناءاللہ کا اعلان
انہوں نے کہا کہ رانا ثنا اللہ ماضی میں پاکستان پیپلز پارٹی کے سخت ترین ناقد رہے ہیں تاہم وہ موجودہ حکومت کے سخت ترین ناقدین میں مؤثر ترین آواز ہیں۔ گرفتاریاں حکومتوں کی کمزوریاں اور مایوسی کو ظاہر کرتی ہیں۔
Arrest of President Punjab PMLN by Anti-Narcotics force is obviously desperate attempt at political victimization. Sanaullah has been a vociferous critic of PPP in the past & is currently one of the most vocal critics of the regime. Arrests expose govts weakness & desperation.
— BilawalBhuttoZardari (@BBhuttoZardari) July 1, 2019
مسلم لیگ نون کی نائب صدر مریم نواز نے سماجی رابطہ کی ویب سائٹ پر کہا کہ اینٹی نارکوٹکس فورس (اے این ایف) کا رانا ثنا اللہ کی گرفتاری سے کیا تعلق ہے تاہم ان کی گرفتاری ان کے واضح اور دو ٹوک مؤقف کی وجہ سے عمل میں آئی ہے۔
What has ANS got to do with Rana Sanaullah? It could not get more absurd. He has been arrested for his bold & courageous stance. Jaali-e-Azam being the small & petty minded man that he is, is directly behind his arrest. Make no mistake. https://t.co/7ziuR51u6h
— Maryam Nawaz Sharif (@MaryamNSharif) July 1, 2019
مریم نواز نے کہا کہ مسلم لیگی رہنما کی گرفتاری کے پیچھے جعلی اعظم کا ہاتھ ہے انہوں نے خود کو چھوٹا اور تنگ نظر ثابت کیا۔
مسلم لیگ نون پنجاب کے صدر کی گرفتاری کے خلاف فیصل آباد کے وکلا نے بھی منگل کو مکمل ہڑتال کا اعلان کر دیا۔ ڈسٹرکٹ بار کونسل نے کہا کہ رانا ثنا اللہ ڈسٹرکٹ بار کے رکن ہیں اور ان کی سیاسی گرفتاری کی مذمت کرتے ہیں۔
رانا ثنا اللہ کی گرفتاری کے خلاف فیصل آباد میں احتجاجی مظاہرہ کیا گیا اور سمندر روڈ پر ٹائر جلا کر سڑک کو ٹریفک کے لیے بند کر دیا گیا۔