لاہور:پنجاب اسمبلی میں قائد حزب اختلاف حمزہ شہباز شریف نے کہا ہے کہ عمران خان اپنی فکر کریں اور حکومت ایسے بیج نا بوئے جنہیں کاٹنا مشکل ہوجائے۔
لاہور کی احتساب عدالت میں پیشی کے موقع پرذرائع ابلاغ کے نمائندوں سے غیر رسمی گفتگو کرتے ہوئے حمزہ شہباز نے کہا کہ رانا ثناءاللہ کی گرفتاری نہیں، یہ قوم کے ساتھ تماشہ اور مذاق ہے، پوری قوم اس مذاق پر ہنس رہی ہے لیکن یہ تماشہ زیادہ دیر تک نہیں چلتا، قوم سب جانتی ہے کہ رانا ثناءاللہ پر کیا کیس بنایا گیا۔
حمزہ شہبا زکا کہنا تھا کہ 72 سال بعد بھی بھینس چوری اور منشیات کے مقدموں کا سلسلہ بند نہیں ہوسکا، حکومت کو سیاسی انتقام سے بالاتر ہوکر سامنے آنا چاہیے، حکومت ایسے بیج نا بوئے جس کو کاٹنا مشکل ہوجائے
قائد حزب اختلاف پنجاب اسمبلی نے کہا کہ رانا ثناءاللہ کے خلاف جب کچھ نا ملا تو منشیات کا مقدمہ ڈال دیا، منشیات کے الزام کے بعد کوئی کسر رہ نہیں گئی۔
انہوں نے کہا کہ یہ پیشیوں کا سیزن ہے، پیشیاں مذاق بنی ہوئی ہیں، قوم دیکھ رہی ہے، قوم پر مہنگائی کا طوفان امڈ آیا ہے، جو مشکل وقت قوم پر آیا ہے، اللہ تعالی اسے دور کرے، اپوزیشن عوام کے ساتھ کھڑی ہے، عوام کی زندگی قیامت بنا دی گئی ہے۔
یہ بھی پڑھیے: رمضان شوگر ملز کیس: قومی اور پنجاب اسمبلی کے اپوزیشن لیڈرز کی بطور ملزم پیشی
حمزہ شہباز نے مزید کہا کہ عمران خان کی حالت قابل ترس ہے وہ بغض اور حسد میں گرفتار ہیں، یہ دن تھوڑے ہیں ظلم کی رات ڈھل جائے گی، مجھے اپنی فکر نہیں اللہ ملک کی خیر کرے، پروڈکشن آرڈر نہ ملنے کی کوئی پرواہ نہیں، عمران خان اپنی فکر کریں۔
