پاکستان کو سعودی عرب سے ادھار تیل کی فراہمی شروع ہوگئی ہے اور پہلا جہاز تیل لیکر کراچی کی بندرگاہ پر لنگر انداز ہوگیاہے۔
پاکستان کو سعودی عرب سے تیل کی ترسیل کا آغاز لائٹ کروڈ آئل سے لدے اس بحری جہاز سے ہوا ہے جو آج کراچی کے ساحل پرشام ساڑھے پانچ بجے پہنچا ہے۔
سعودی عرب سے آنے والے بحری جہاز کا پاکستانی حکام نے کراچی خیر مقدم کیا۔
واضح رہے کہ سعودی عرب اور پاکستان کے درمیان ادھار تیل کی سپلائی کے لیے تین سال کا معاہدہ ہے۔ پاکستان کو تیل کی سپلائی کی ادائیگی میں فوری ادائیگی نہ کرنے کا ریلیف ملیگا۔
سعودی عرب پاکستان کو ماہانہ 27کروڑ 50لاکھ ڈالر کا تیل فراہم کریگا۔ 9ارب 90کروڑ کاتیل پاکستان کوتین سالوں میں سعودی عرب کی طرف سے ملتا رہے گا۔
واضح رہے کہ مشیر خزانہ ڈاکٹر عبد الحفیظ شیخ نے کہا تھا کہ سعودی عرب یکم جولائی سے ادھار پر ہر ماہ ساڑھے 27 کروڑ ڈالر مالیت کا تیل پاکستان کو فراہم کرنا شروع کردے گا۔
2./ From 1st July 2019 KSA is activating the deferred payment for petroleum products facility of US$ 275mn per month amounting to US$3.2 Billion per year for 3 years. This will strengthen Pakistan's Balance of Payments position.
— Dr. Abdul Hafeez Shaikh (@a_hafeezshaikh) May 22, 2019
اپنے ٹوئٹر پیغام میں ان کا کہنا تھا کہ تین سال کے دوران ہر سال مجموعی طور پر تین ارب 20 کروڑ ڈالر کا تیل پاکستان کو ملے گا۔
حفیظ شیخ نے کہا کہ سعودی مدد سے پاکستان کو ادائیگیوں کے توازن کو بہتر کرنے میں مدد ملے گی۔
دوسری جانب پاکستان تحریک انصاف (پی ٹی آئی) کے رہنما جہانگیر ترین نے پیشرفت پر اپنے ردعمل میں کہا ہے کہ سعودی عرب کی جانب سے ادھار تیل کی صورت میں پاکستان کی امداد انتہائی خوش آئند خبر ہے۔
انہوں نے کہا کہ مشکل وقت میں برادر ملک نے ایک بار پھر پاکستان کا ساتھ دے کر حقیقی دوست ہونے کا ثبوت دیا ہے۔
ان کا مزید کہنا تھا کہ اس اہم پیش رفت کے نتیجہ میں انشاء اللّه روپے کی قدر میں بتدریج بہتری آئے گی۔
سعودی عرب کی جانب سے پاکستان کی گرتی معیشت کو سہارا دینے کی غرض سےاعلان کردہ تین ارب ڈالر کی پہلی قسط میں سے ایک ارب ڈالر کی رقم گزشتہ سال 19 نومبر کو موصول ہو گئی تھی جس کے بعد پاکستان کے مجموعی ذخائر میں اضافہ ہوا۔
خیال رہے کہ 23 اکتوبر کو وزیرِ اعظم عمران خان کے دورے کے موقع پر سعودی عرب کی جانب سے 12 ارب ڈالر کے امدادی پیکج کا وعدہ کیا گیا تھا۔
دونوں ممالک کے مابین اس بات پر بھی اتفاق کیا گیا تھا کہ تاخیر سے ادائیگی کی بنیاد پر سعودی عرب پاکستان کو سالانہ 3 ارب ڈالر مالیت کا تیل دے گا اور یہ سلسلہ 3 سال تک جاری رہے گا۔
یہ بھی پڑھیے:پاکستان کو تیل کی فراہمی رواں ماہ سے شروع ہو گی
