مسئلہ افغانستان حل نہ ہوا تو داعش خطرہ بن جائے گی، عمران خان

مسئلہ افغانستان حل نہ ہوا تو داعش خطرہ بن جائے گی، عمران خان

واشنگٹن: وزیراعظم عمران خان نے متنبہ کیا ہے کہ اگر مسئلہ افغانستان حل نہ ہوا تو داعش پوری دنیا کے لیے خطرہ بن جائے گی۔ انہوں نے واضح کیا کہ شکیل آفریدی کا درجہ پاکستان میں جاسوس کا ہے لیکن عافیہ صدیقی کے بدلے اس کی رہائی پر بات ہو سکتی ہے۔ انہوں نے شکوہ کیا کہ ہم امریکہ کے اتحادی تھے تو اسامہ بن لادن کی گرفتاری میں پاکستان کو اعتماد میں لیا جانا چاہیے تھا۔

امریکی نشریاتی ادارے ’فاکس نیوز‘ کو ایک انٹرویو دیتے ہوئے وزیراعظم عمران خان نے کہا کہ  دو امریکی اور ایک آسٹریلوی مغوی اس وقت افغانستان میں ہیں جن کی رہائی کے لیے پاکستان کوشش کررہا ہے۔ انہوں نے توقع ظاہر کی کہ آئندہ 48 گھنٹوں میں اس حوالے سے اچھی خبر ملنے کے لیے پر امید ہیں۔

کشمیر : امریکی اور بھارتی پالیسیوں میں تبدیلی کے واضح اشارے

امریکی صدر ڈونلڈ ٹرمپ سے اپنی ملاقات کے متعلق انہوں نے کہا کہ میں ملاقات سے بہت خوش ہوں کیوں کہ صدر  صاف گو انسان لگے جو لفظوں کی ہیرا پھیری نہیں کرتے ہیں۔ ان کا کہنا تھا کہ اس ملاقات سے میرا پورا وفد بھی بہت خوش ہے۔

ایک سوال پر انہوں نے کہا کہ افغانستان کے لوگ گزشتہ چار دہائیوں سے خانہ جنگی کے باعث شدید متاثر ہیں اور انہیں امن کی ضرورت ہے۔ ان کا کہنا تھا کہ طالبان کو حکومت کا حصہ بنا کر عوام کو نمائندگی دی جانی چاہیے۔ انہوں نے کہا کہ طالبان کے ساتھ حالیہ امن مذاکرات کامیاب رہے ہیں۔ انہوں نے دعویٰ کیا کہ امریکہ کو طالبان سے کوئی خطرہ نہیں ہونا چاہیے۔

وزیراعظم عمران خان نے کہا کہ افغانستان کے حوالے سے آئیڈیل صورتحال یہ ہوگی کہ وہاں ایک وسیع تر حکومت بنے جو کسی کے لیے بھی خطرہ نہیں ہو گی۔ ان کا کہنا تھا کہ ہم خطے میں امن کے خواہاں ہیں۔

امریکی صدر کی مسئلہ کشمیر پر ثالثی کی پیشکش، بھارتی میڈیا آگ بگولہ

خطے میں پائی جانے والی کشیدگی کے حوالے سے ان کا کہنا تھا کہ ایران کے مسئلے پر مصالحت کے حق میں ہیں اور اس ضمن میں اپنا کردار بھی ادا کرنے کو تیار ہیں۔

وزیراعظم نے واضح کیا کہ جنگ کے باعث خطہ پہلے ہی متاثر ہے۔ ان کا کہنا تھا کہ بھارت کے ساتھ اچھے تعلقات کے خواہش مند ہیں اور مسئلہ کشمیر کے حل کے متمنی ہیں۔

ایک سوال پر انہوں نے کہا کہ نیوکلیئر آپشن نہیں ہے۔ ان کا کہنا تھا کہ خطے میں ایک ارب سے زائد لوگ بستے ہیں اور کسی بھی جنگ کی صورت میں سب متاثر ہوں گے۔


متعلقہ خبریں