پاکستان تحریک انصاف (پی ٹی آئی )ارکان سندھ اسمبلی نے سابق صدر آصف زرداری کی ہمشیرہ اور رکن سندھ اسمبلی فریال تالپور کی نااہلی کےلئے ایک بار پھر الیکشن کمیشن سے رجوع کرلیاہے ۔
پی ٹی آئی کے اراکین ارسلان گھمن اوررابعہ اظفر نے فریال تالپور کے خلاف درخواست الیکشن کمشنر سندھ میں جمع کرا دی ہے۔
درخواست میں مؤقف اختیار کیا گیا ہے کہ فریال تالپور نے گوشواروں میں اپنی جائیدادوں کوظاہر نہیں کیا، انہیں اثاثے چھپانے پرسندھ اسمبلی کی رکنیت کے لیے نااہل قرار دیا جائے۔
درخواست میں کہا گیا ہے 22جون کو اسپیکر سندھ اسمبلی آغا سراج درانی کو فریال تالپور کی نااہلی کی درخواست دی تھی، اسپکر سندھ اسمبلی نے قانون کے مطابق 30 دن گزرنے کے باوجود بھی کوئی فیصلہ نہیں کیا۔
پاکستان تحریک انصاف کی جانب سے اسپیکر کو دی جانے والی درخواست کی کاپی الیکشن کیشمن کو بھی فراہم کی تھی ۔ صوبائی الیکشن کمشنر یوسف خان خٹک نےفریال تالپور کی نااہلی سے متعلق درخواست وصول کرلی۔
یاد رہے اس سے قبل بھی پی ٹی آئی کے پارلیمانی لیڈر حلیم عادل شیخ اور رکن سندھ اسمبلی ارسلان تاج نے الیکشن کمیشن کراچی کے دفتر میں جمع کروائی تھی۔
24 جون کو دائر کی جانے والی درخواست میں موقف اختیار کیا گیا کہ فریال تالپور جعلی اکاؤنٹس بنانے،منی لانڈرنگ کرنے اور کرپشن میں ملوث ہیں۔
پاکستان تحریک انصاف کے رہنماؤں نے موقف اختیار کیا ہے کہ فریال تالپورکےخلاف اسلام آباد کی احتساب عدالت میں ریفرنس زیرسماعت ہے۔ اس لیے وہ اسمبلی میں رکنیت کی اہل نہیں ہیں۔
پی ٹی آئی نے الیکشن کمیشن سے استدعا کی ہے کہ فریال تالپور کونااہل قراردیاجائے۔
واضح رہے کہ پیپلزپارٹی کی رہنما فریال تالپور کو نیب راولپنڈی نے 14جون کو اسلام آباد میں انکی رہائش گاہ واقع سیکٹر ایف ایٹ سے حراست میں لیکر انہی کے گھر کو سب جیل قرار دے دیا تھا۔
مبینہ جعلی بینک اکاؤنٹس کیس میں گرفتار پیپلز پارٹی کی رہنما فریال تالپور کو وفاقی دار الحکومت اسلام آباد میں قائم احتساب عدالت نے15جون کو 9روزہ جسمانی ریمانڈ پر نیب کے حوالے کردیاتھا۔
قومی احتساب بیورو(نیب) نے فریال تالپور کو جج ارشد ملک کی عدالت میں پیش کرکے عدالت سے فریال تالپور کے جسمانی ریمانڈ کی استدعا کی تھی ۔
ڈپٹی پراسیکیوٹر جنرل نیب سردار مظفر عباسی نے عدالت کو بتایا تھا کہ ہائی کورٹ سے ضمانت مسترد ہونے پر نیب نے فریال تالپور کو کل گرفتار کیا،فریال تالپور کو انکی رہائشگاہ پر ہاؤس اریسٹ میں رکھا گیا ہے۔ جعلی اکاؤنٹس ریفرنس میں فریال تالپور کا مرکزی کردار ہے۔
نیب پراسیکیوٹر نےعدالت کو آگاہ کیا کہ سب جیل پر دو خواتین افسران کو تعینات کیا گیا ہے۔ملزمہ سے تفتیش کیلئے چودہ روزہ جسمانی ریمانڈ منظور کیا جائے۔
نیب پراسیکیوٹر نے کہا فریال تالپور زردای گروپ کے اکاؤنٹس کی ڈائریکٹر ہیں، فریال تالپور کے دستخط سے زرداری گروپ کے اکاؤنٹ سے 30 ملین کی رقم اویس مظفر کے اکاؤنٹ میں منتقل ہوئی۔ فریال تالپور نے دیگر ملزمان کے ساتھ مل کر غیرقانونی رقم کو لانڈر کیا۔
یہ بھی پڑھیے:فریال تالپور کی نااہلی کیلئے الیکشن کمیشن میں درخواست دائر
