اسلام آباد: حکومت نے پیٹرولیم مصنوعات کی قیمتوں میں کمی کا اعلان کر دیا گیا نئی قیمتوں کا اطلاق آج رات 12 بجے سے ہو گا۔
وزارت خزانہ کی جانب سے پیٹرولیم مصنوعات کی نئی قیمتوں کا تعین کر دیا گیا۔ جاری کردہ نوٹیفکیشن کے مطابق پیٹرول 4 روپے 59 پیسے سستا ہو کر 113 روپے 24 پیسے کا ہو گیا جبکہ ہائی اسپیڈ ڈیزل کی قیمت میں 5 روپے 33 پیسے فی لیٹر کمی کی گئی ہے جس کے بعد ہائی اسپیڈ ڈیزل کی نئی قیمت 127 روپے 14 پیسے فی لیٹر ہو گئی۔
مٹی کا تیل 4 روپے 27 پیسے فی لیٹر سستا ہونے کے بعد 99 روپے 57 پیسے کا ہو گیا۔ لائٹ ڈیزل کی فی لیٹر قیمت میں بھی 5 روپے 63 پیسے کی کمی کی گئی ہے اور لائٹ ڈیزل کی نئی قیمت 91 روپے 89 پیسے فی لیٹر مقرر کر دی گئی۔
حکومت کی جانب سے جاری کردہ نوٹیفکیشن کے مطابق پیٹرولیم مصنوعات کی نئی قیمتوں پر اطلاق آج رات 12 بجے سے ہو گا۔
اس سے قبل حکومت نمائندے پیٹرولیم مصنوعات کی نئی قیمتوں میں کمی کا دعویٰ کر رہے تھے جبکہ وزارت خزانہ نے حتمی فیصلہ نہ ہونے سے متعلق کہا تھا کہ فی الحال نئی قیمتوں کا تعین نہیں کیا گیا۔
وزیر اعظم کی معاون خصوصی برائے اطلاعات ڈاکٹر فردوس عاشق اعوان نے سماجی رابطہ کی ویب سائٹ پر پیٹرولیم مصنوعات کی قیمتوں میں کمی کی خبر دی تھی اور بتایا تھا کہ کتنے روپے کمی ہو گی۔
ڈاکٹر فردوس عاشق اعوان کے مطابق پیٹرول کی قیمت میں 4 روپے 54 پیسے، مٹی کا تیل 4 روپے 27 پیسے، ہائی اسپیڈ ڈیزل کی قیمت 5 روپے 33 پیسے فی لیٹر کمی کی جا رہی ہے جبکہ ہائی اسپیڈ ڈیزل کی قیمت میں 7 روپے 76 پیسے کی کمی کی گئی ہے۔
عوام دوست حکومت کا عوام کو ریلیف دینے کیلئے عملی اقدام۔عالمی منڈی میں تیل کی قیمتوں میں کمی کا فائدہ حکومت خود لینے کی بجائے براہ راست عوام کو منتقل کرےگی وزیراعظم عمران خان کی قیادت میں نئے پاکستان کا دوسرا سال قومی ترقی عوامی فلاح وبہبود اور ملک کیلئے نئی خوشخبریاں لیکر آئے گا۔ pic.twitter.com/MbDPb6IQZk
— Firdous Ashiq Awan (@Dr_FirdousPTI) August 30, 2019
وفاقی وزیر توانائی عمر ایوب خان کی جانب سے بھی پیٹرولیم مصنوعات میں کمی کی خبر دی گئی تھی تاہم ان کی جانب سے بتائی گئی قیمت اور ڈاکٹر فردوس عاشق کی جانب سے بتائی گئی پیٹرول کی قیمتوں میں تضاد تھا۔
حکومت کی طرف سے عوام کیلئے پٹرولیم مصنوعات کی قیمتوں میں کمی کا مکمل اور فوری فائدہ پہنچایا جا رہا ہے یکم ستمبر سے پٹرول کی قیمت میں4.59روپے کی کمی کی جا رہی ہے ہائی سپیڈ ڈیزل کی قیمت 5.33روپے،مٹی کی تیل کی قیمت 4.27 روپے اور لائٹ ڈیزل کی قیمت 5.63 کم کی جارہی ہے pic.twitter.com/Gh1osBptsg
— Omar Ayub Khan (@OmarAyubKhan) August 30, 2019
حکومتی عہدیداروں کے دعوؤں نے عوام کو پریشانی میں مبتلا کر دیا تھا اور عوام تذبذب کا شکار تھی کہ حکومت کمی کرے گی بھی یا نہیں ۔
