اسلام آباد: وزیر ریلوے شیخ رشید احمد نے بھارت کو خبردار کرتے ہوئے کہا ہے کہ کسی نے پاکستان پر حملے کی کوشش کی تو یہ آخری جنگ ہوگی۔
اپنے خطاب میں ان کا کہنا تھا کشمیر سے متعلق بھارت کی نیت ٹھیک نہیں، اس مسئلے پر پاکستان میں حزب اختلاف اور حکومت ایک ہے۔
انہوں نے کہا کہ بھارت نے دو بڑی غلطیاں کی ہیں اور اب مذاکرات کی کوئی گنجائش نہیں چھوڑی۔
شیخ رشید احمد نے کہا کہ اگر بھارت ایٹمی دھماکہ نہ کرتا توپاکستان ایٹمی طاقت نہ بنتا۔
انہوں نے کہا کہ ہم ایٹمی جنگ نہیں چاہتے مگر ہمارے پاس پاؤ اور آدھا پاؤ کے بھی بم ہیں، بھارت جیسا ماحول چاہے گا ہم وہی ماحول بنائیں گے۔
ان کا کہنا تھا کہ کشمیر کا مسئلہ اقوام متحدہ کی قراردادوں کے مطابق ہی حل ہونا ہے۔
شیخ رشید کا کہنا تھا کہ بھارت نے بہت سوچھ سمجھ کر فیصلہ کیا ہے جبکہ نریندر مودی آر ایس ایس کے نظریے پر چلتا ہے۔
انہوں نے کہا کہ پہلے ہی کہا تھا مودی کشمیر اور پاکستان کے خلاف کوئی فیصلہ نہیں چھوڑے گا۔
انہوں نے کہا کہ ننکانہ صاحب اسٹیشن کو بابا گورونانک اسٹیشن کا نام دے رہے ہیں۔
شیخ رشید احمد کا مزید کہنا تھا کہ لاہور سے ننکانہ صاحب کےلیے بابا گورونانک اسٹیشن چلانے کا سوچ رہے ہیں۔
