کراچی: کاروباری ہفتے کے چوتھے روز ڈالر کی قیمت گزشتہ روز کی قیمت پر برقرار رہی۔
فاریکس ڈیلرز کے مطابق کاروبار کے اختتام پر اوپن مارکیٹ میں ڈالر کی قیمت بدھ کی قیمت پر برقرار رہی۔ کاروبار کے اختتام پر ڈالر کی قیمت 156 روپے 50 پیسے کی سطح پر برقرار رہی جبکہ کاروبار کے دوران انٹر بینک میں ڈالر کی قیمت 12 پیسے اضافے کے ساتھ 156.35 روپے پر ٹریڈ کرتے دیکھی گئی۔
گزشتہ روز روپے کے مقابلے میں ڈالر کی قدر میں 30 پیسے کمی ہوئی اور اوپن مارکیٹ میں ڈالر 156.50 روپے میں فروخت ہوا تھا۔
اسی طرح انٹر بینک میں ڈالر 156.50 روپے میں فروخت کیا گیا۔
یاد رہے کہ اگست 2018 میں پاکستان تحریک انصاف (پی ٹی آئی) کی حکومت برسراقتدار آئی تو ڈالر 122 روپے کا تھا اور گزشتہ ایک سال سے ڈالر کی قیمت میں مسلسل اضافہ دیکھا گیا تاہم اب ڈالر کی قیمت میں اضافہ رک گیا ہے۔
ستمبر 2018 میں ڈالر 134 اور نومبر میں 142 پر ٹریڈ کررہا تھا ۔ گزشتہ سال کے اختتام پر ڈالر 139 روپے 40 پیسے کا ہوچکا تھا۔
2019 میں بھی ڈالر کی قیمت میں روپے کے مقابلے میں پیش رفت جاری رہی۔ جنوری میں ڈالر 138 روپے93 پیسے، فروری میں 138 روپے 90 پیسے اور مارچ میں 139 روپے10 پیسے پر ٹریڈ کررہا تھا۔
اپریل 2019 میں ڈالر چھلانگ لگا کر 141 روپے 50 پیسے پر آگیا۔ مئی میں 151 روپے اور جون میں تاریخ کی بلند ترین سطح 164روپے پر پہنچ گیا۔
جولائی 2019 میں ڈالر کی اڑان رک گئی اور ڈالر کمی کے بعد انٹربینک میں 160 روپے اور اوپن مارکیٹ میں 161 روپے کا ہوگیا۔
اگست 2019 میں روپے نے ڈالر کا جم کر مقابلہ کیا اور ڈالر 157.20 روپے تک پہنچ گیا۔
