وزیراعظم کا لیجنڈری پاکستانی اسپنر عبدالقادر کے انتقال پر اظہار افسوس

اسلام آباد: وزیراعظم عمران خان نے سابق لیگ اسپنر عبدالقادر کے انتقال افسوس کا اظہار کیا ہے۔

اس ضمن میں ٹوئٹر سے جاری اپنے پیغام میں ان کا کہنا تھا کہ ’ میری دعائیں عبدالقادر کے اہل خانہ کے ساتھ ہیں ،وہ دنیا کے عظیم اسپنرزمیں سے ایک تھے،۔

Qadir’s bowling statistics do not do justice to his genius. Had he been playing cricket now with the modern DRS system, where batsmen can be given out on the front foot as well, Qadir would have gotten as many wickets as the great Shane Warne.

— Imran Khan (@ImranKhanPTI) September 7, 2019

انہوں نے کہا کہ عبدالقادر ڈریسنگ روم کی جان تھے، ان کی حس ِمزاح اور ذہانت سے ٹیم ہمیشہ محظوظ ہوتی تھی۔

عمران خان نے کہا کہ عبدالقادر کی باؤلنگ کے اعداد وشمار ان کی صلاحیتوں کی درست عکاسی نہیں کرتے۔

انہوں نے کہا کہ اگرعبدالقادر موجودہ دور کی کرکٹ میں کھیل رہے ہوتے جہاں فرنٹ فٹ پر بلے باز کو آؤٹ قرار دے دیا جاتا ہے اور اس کے ساتھ ڈی آر ایس کی سہولت بھی دستیاب ہے تو ان کی وکٹوں کی تعداد عظیم آسٹریلین اسپنر شین وارن سے زیادہ ہوتی۔

یاد رہے نامور گگی ماسٹر عبدالقادرکل لاہورمیں حرکت قلب بند ہونے سے انتقال کرگئے تھے۔

عبدالقادر کے صاحبزادے سلمان قادر کے مطابق اچانک ہارٹ اٹیک کے باعث انہیں سروسز اسپتال منتقل کیا گیا تھا جہاں وہ جانبر نہ ہوسکے۔

وسیم اکرم کی طرف سے جاری بیان میں کہا گیاہے کہ دنیا کے کرکٹرز عبدالقادر کو جادو گر کہا کرتے تھے ،  جب انہوں نے میری آنکھ میں دیکھا تو کہا بیس سال تک کرکٹ کھیلو گے۔ میں نے ان پر یقین کیا وہ واقعی جادو گر تھے۔ دنیا عبدالقار کو یاد کرے گی مگر بھولے گی نہیں۔

پاکستان کے سابق مایہ ناز فاسٹ بالر شعیب اختر نے کہاہے کہ عبدالقادر کے انتقال پر دلی دکھ ہے۔ میری تمام تر ہمدردیاں سابق ٹیسٹ کرکٹر کے اہل خانہ کے ساتھ ہیں۔ عبدالقادر نے مجھے 2009 میں سیلکٹ کیا تھا۔

شعیب اختر نے کہا کہ عبدالقادرکی وجہ سے میں نے قومی ٹیم میں کم بیک کیا۔انہوں نے مجھ پر بہت بڑا احسان کیا ہے۔

وزیر اعلی پنجاب سردار عثمان بزدار کا معروف سابق ٹیسٹ کرکٹر عبدالقادر کے انتقال پر دکھ اور افسوس کا اظہارکیاہے۔ سردارعثمان بزدارنے سوگوار خاندان سے دلی ہمدردی اوراظہار تعزیت کیاہے۔