لاہور: صدر مملکت ڈاکٹر عارف علوی نے کہا کہ پاکستان سیاحت کے لیے اب پر امن ملک بن چکا ہے اور لاہور آنے والے وفود نے سیکیورٹی پر اطمینان کا اظہار کیا ہے۔
صدر مملکت ڈاکٹر عارف علوی نے لاہور میں ہونے والے ٹی ٹوینٹی سیریز کے آخری میچ میں شرکت کی۔ پنک ڈے کی مناسبت سے قذافی اسٹیڈیم میں تقریب کا بھی اہتمام کیا گیا جس میں صدر مملکت ڈاکٹر عارف علوی نے خصوصی شرکت کی۔
صدر مملکت نے کہا کہ مجھے لاہور آ کر بہت خوشی محسوس ہوئی، پاکستان میں کرکٹ کے بہت شوقین موجود ہیں اور میدان میں شائقین کرکٹ کی اتنی بڑی تعداد دیکھ کر دل خوش ہو گیا۔
انہوں نے کہا کہ کرکٹ کا پاکستان میں نہ ہونا بہت زیادتی تھی۔ سیکیورٹی کے انتظامات دیکھ کر امید ہے پاکستان میں انٹرنیشنل کرکٹ مکمل واپس آئے گی۔ انگلینڈ اور آئرلینڈ کے وفود لاہور میں موجود ہیں، جو سیکیورٹی سے مطمئن ہیں۔
ڈاکٹر عارف علوی نے کہا کہ سری لنکن ٹیم کے جونیئر کھلاڑیوں نے بھی بہت اچھا پرفارم کیا۔ پاکستان سیاحت کے لیے اب ایک پر امن ملک ہے۔
یہ بھی پڑھیں ٹی ٹوینٹی سیریز، سری لنکا نے پاکستان کو وائٹ واش کر دیا
انہوں نے بریسٹ کینسر کے حوالے سے بات کرتے ہوئے کہا کہ ماؤں، بہنوں اور بیٹیوں کو بریسٹ کینسر کے حوالے سے خود خیال رکھنا چاہئے۔ احسان مانی کا شکریہ ادا کرتا ہوں جنوں نے اس میچ پر پنک ربن ڈے منایا۔
