لاہور: مسلم لیگ نواز کے رہنما اور سابق وزیر ریلوے خواجہ سعد رفیق کو ڈپٹی کمشنر نے پیرول پر رہائی دے دی۔
خواجہ سعد رفیق نے پیرول پر رہائی کے لیے درخواست دی تھی جسے منظور کرلیا گیا۔
ن لیگی رہنما نے ساس کے انتقال پر جنازے میں شرکت کے لیے درخواست جمع کرائی تھی جس میں مؤقف اختیار کیا گیا تھا کہ پیرول پر رہائی دی جائے تاکہ نماز جنازہ اور تدفین میں شرکت کر سکوں۔
سابق وفاقی وزیر اور ان کے بھائی خواجہ سلمان رفیق کو گزشتہ سال دسمبر میں پیراگون کرپشن کیس میں نیب نے گرفتار کرلیا تھا۔
پیراگون سٹی اسکینڈل
نیب کا الزام ہے کہ خواجہ سعد رفیق نے اپنی اہلیہ، بھائی سلمان رفیق، ندیم ضیا اور قیصر امین بٹ سے مل کر ائیر ایونیو سوسائٹی بنائی۔
نیب کا کہنا ہے کہ بعد ازاں ائیر ایونیو کا نام تبدیل کرکے پیراگون رکھ لیا گیا، خواجہ برادران نے اپنے ساتھیوں سے مل کر عوام کو دھوکہ دیا اور رقم بٹوری۔
نیب نے الزام لگایا ہے کہ خواجہ سعد رفیق اور سلمان رفیق پیراگون ہاوسنگ سوسائٹی سے فوائد حاصل کرتے رہے ہیں، خواجہ برادران کے نام پیراگون میں 40 کنال اراضی موجود ہے۔
خواجہ سعد رفیق نے اپنے اختیارات کا ناجائز استعمال کرتے ہوئے غیر قانونی ہاوسنگ سوسائٹی کی تشہیر کی اور عوام سے اربوں روپے بٹورے۔
ترجمان نیب نے کہا ہے کہ خواجہ برادران کو پیراگون سٹی کرپشن کیس میں مبینہ طور پر مالی فوائد حاصل کرنے کے الزام میں گرفتار کیا گیا ہے۔
خواجہ برادران کی گرفتاری درخواست ضمانت مسترد ہونے کے بعد عمل میں لائی گئی ہے۔ ترجمان نیب کے مطابق ملزمان کیخلاف معقول شواہد پیش کرنیکی تصدیق بھی ہوئی ہے۔
