اسلام آباد: ٹک ٹاک اسٹار حریم شاہ نے حال ہی میں منظر عام پر آنے والی دفتر خارجہ میں بنائی گئی متنازع ویڈیو سے متعلق قوم سے معافی مانگ لی۔
سماجی رابطے کی ویب سائٹ ٹوئٹر سے جاری اپنے وضاحتی ویڈیو میں انہوں نے کہا کہ اگر وزیراعظم کی کرسی پر بیٹھنے سے میرے پاکستانیوں کے دل کو ٹھیس پہنچی ہے تو میں معذرت خواں ہوں پر میرا مقصد صرف ٹک ٹاک کیلئے ویڈیو بنانا تھا۔
— Hareem Shah (@HareemSha12) October 25, 2019
انہوں نے بتایا کہ وہ وزیر خارجہ شاہ محمود قریشی کی بہت بڑی فین ہیں اور وہ ان کے زیادہ پسندیدہ سیاستدان ہیں۔
ان کا کہنا تھا کہ میں نے دفتر کے ایک اعلی سرکاری اہلکار سے اجازت لی تھی اسی لیئے کسی نے مجھے وزارت کے اندر داخل ہونے اور ویڈیو بنانے سے منع نہیں کیا۔
انہوں نے مزید بتایا کہ میرا جیسے ہی وہاں سے گزر ہوا تو ان سے ملنے کا شوق رکھتے ہوئے ان کے دفتر چلی گئی تاہم بدقسمتی سے میری ان سے ملاقات نہ ہو سکی۔
ان کا کہنا تھا کہ دفتر خارجہ کی انتظار گاہ پر میں نے کچھ تصویریں اور ویڈیوز بنا کر شیئر کر دیں جس کو ہر ایک نے اپنے نئے نئے انداز میں بیان کرنا شروع کر دیا، بہر حال ایسا کچھ نہیں جو لوگ کہہ رہے ہیں کہ مجھے وہاں کون لے کر گیا، ایسی کوئی بات نہیں ہے۔
یاد رہے کچھ روز قبل ہم نیوز کے مارننگ شو “صبح سے اگے” میں میزبان شفا یوسفزئی سےسوشل میڈیا پر اپنی وائرل ہوئی ویڈیو کے حوالے سے بات کرتے ہوئے انہوں نے بتایا کہ وزارت خارجہ گئی تو وہاں شناخت کی گئی لیکن موبائل فون اندر لے کر جانے سے کسی نے نہیں روکا۔
انہوں نے بتایا کہ آفس میں معمول کے مطابق کام ہو رہے تھے۔ سب لوگ اپنا اپنا کام کر رہے تھے، مجھ سے کسی قسم کے سوالات نہیں کیے گئے۔
ٹک ٹاک اسٹار کے مطابق آفس میں ہی موجود ایک شخص سے انہوں نے اپنی ویڈیو اور تصاویر بنانے کا کہا تھا لیکن وہ اس شحص کو جانتی نہیں تھیں۔
حریم شاہ نے کہا کہ وزیر خارجہ شاہ محمود قریشی کی کرسی پر بیٹھنا میری غلطی تھی، میں نہیں جانتی تھی کہ وہ ان کی کرسی ہے۔
ایک سوال کے جواب میں انہوں نے بتایا کہ کسی بھی شخصیت سے ملنے کے حوالے سے مجھے کبھی کسی مشکل کا سامنا نہیں کرنا پڑا، میں نے کبھی کسی کو نہیں کہا کہ مجھے کسی تقریب میں مدعو کریں نہ ہی کبھی کسی نے کیا۔ جو خواہش ہوتی ہے خدا سے مانگتی ہوں اور وہ پوری ہو جاتی ہے۔
سوشل میڈیا پر وائرل ایک تصویر کا حوالہ دیتے ہوئے حریم شاہ نے بتایا کہ وزیراعظم جب دبئی گئے تو میں وہاں پہلے سے موجود تھی، ان کی ٹیم کے لوگ مجھے جانتے تھے اس لیے کسی نے ان سے ملنے سے نہیں روکا۔
ٹک ٹاک اسٹار کا مزید کہنا تھا کہ نواز شریف جب وزیراعظم ہاؤس ہوتے تھے تب میں وہاں بھی جایا کرتی تھی۔
