اسلام آباد: وزیر اعظم عمران خان نے کہا ہے کہ قانون کی حکمرانی سے کسی صورت پیچھے نہیں ہٹوں گا، این آر او مانگنے والے احمقوں کی جنت میں رہتے ہیں۔
انہوں نے یہ بیان سابق وزیر قانون ڈاکٹر بابر اعوان کی ملاقات میں دیا جس کے دوران سابق وزیراعظم نواز شریف کا نام ایگزٹ کنٹرول لسٹ (ای سی ایل) سے نکالنے سے متعلق لاہور ہائیکورٹ کے فیصلے پر تبادلہ خیال کیا گیا۔
وزیر اعظم کا کہنا تھا ملک میں انصاف کا بول بالا چاہتا ہوں، احتساب ہمیشہ پہلی ترجیح رہے گی کیوں کرپشن ریاست کےلیے دیمک ہے۔
عمران خان نے کہا کہ عوامی ریلیف کے لیے اس ماہ بڑے ایکشن سامنے آئیں گے، اداروں کی تعمیر نو اور مضبوطی کے بغیر کام نہیں چلےگا۔
کشمیر کے حوالے سے گفتگو کرتے ہوئے ان کا کہنا تھا کہ کشمیر پاکستان کی شہہ رگ ہے اور آزادی کشمیریوں کی منزل ہے۔ انہوں نے مزید کہا کہ میڈیا قوم کی تعلیم و تریبت کا فرض ادا کرے۔
ملاقات کے دوران بابر اعوان نے کہا کہ اصلاحاتی ایجنڈے کے تحت ادارے مضبوط ہورہے ہیں اور وزیراعظم کی کوششوں اور اکنامک ریفارمز سے مثبت تبدیلیاں آرہی ہیں۔
مزید پڑھیں: نواز شریف کے بیرون ملک قیام میں توسیع کا امکان
انہوں نے کہا کہ اکنامک ریفارمز کے ثمرات بہت جلد غریب عوام تک پہنچیں گے جبکہ معیشت کی درستگی کے لیے بروقت اقدامات کو پذیرائی مل رہی ہے۔
سابق وزیر قانون کا کہنا تھا کہ وقت ثابت کرے گا کٹھن فیصلے قوم کے مفاد میں تھے، احساس پروگرام کے تحت غریب عوام تک ریلیف پہنچے گا۔
