کنگز کو اپ سیٹ شکست، زلمی نے میدان مار لیا

March 15, 2018
نازش حسن

شارجہ: پاکستان سپر لیگ کے 27ویں اور اہم میچ میں پشاور زلمی نے کراچی کنگز کو 44 رنز سے شکست دے دی ہے۔

شارجہ کرکٹ اسٹیڈیم میں کھیلے گئے میچ میں زلمی کی جانب سے دیے گئے 182 رنز کے ہدف کے تعاقب میں کنگز کی ٹیم مقررہ 20 اوورز میں8 وکٹوں کے نقصان پر 137 رنز بنا سکی۔

پشاور زلمی سے شکست کھانے کے بعد کراچی کنگز کے پاس پلے آف مرحلے میں کوالیفائی کرنے کے لیے آخری موقع باقی ہے۔ کنگز کو 16 مارچ کو شیڈول کیے گئے میچ میں اسلام آباد یونائٹیڈ کو شکست دینی ہو گی۔

دوسری جانب پشاور زلمی کو بھی پلے آف مرحلے کے لیے کوالیفائی کرنے کے لیے ایک اور امتحان سے گزرنا ہوگا۔ سیمی الیون کو 16 مارچ کو ہی کھیلے جانے والے میچ میں لاہور قلندرز کو شکست دینا ہوگی۔

قلندرز کے خلاف شکست زلمی کو ایونٹ سے اپنا بوریا بستر سمیٹنے پر مجبور کر دے گی۔

دوسری اننگ

ایونٹ کے 27 ویں میچ میں زلمی کی جانب سے دیے گئے ہدف کے تعاقب میں کنگز بلے باز جم کر نہ کھیل سکے۔

کنگز کی پہلی وکٹ 15 رنز کے مجموعی اسکور پر گری۔ اوپنر جو ڈینلے 5 گیندوں کا سامنا کرتے ہوئے بغیر کوئی رن بنائے آؤٹ ہوئے۔

دوسری وکٹ 27 کے مجموعی اسکور پر گری۔ کولن انگرام ساتھی کھلاڑی کی دیکھا دیکھی آٹھ گیندوں کا سامنا کرتے ہوئے بغیر کوئی کھاتہ کھولے پویلین لوٹ گئے۔

کپتان اوئن مورگن اوپنر بیٹسمین بابر اعظم کا ساتھ دینے میدان میں آئے تو صرف پانچ رنز بنا کر لیام ڈاؤسن کی گیند پر آؤٹ ہوئے۔

اسی دوران بابر اعظم نے اپنی نصف سنچری مکمل کی۔ انہوں نے 40 گیندوں کا سامنا کرتے ہوئے ایونٹ میں مسلسل چوتھی نصف سنچری اسکور کی۔

اوئن مورگن کے بعد شاہد آفریدی میدان میں آئے تو جارحانہ بیٹنگ کرتے ہوئے چار چھکوں کی مدد سے 26 رنز بنائے۔

آفریدی آٹھویں گیند پر ہی لیام ڈاؤسن کی گیند باؤنڈری سے پار پہنچانے کی کوشش میں کیچ آؤٹ ہو گئے۔

بابر اعظم آؤٹ ہوئے تو ٹیم کا  مجموعی اسکور 118 تھا۔ بابر نے 50 گیندوں کا سامنا کرتے ہوئے 66 رنز بنائے۔

 

دیگر کھلاڑیوں میں محمد رضوان 16 اور اسامہ میر نو رنز بنا نے میں کامیاب ہوئے۔

زلمی کی جانب سے لیام ڈاؤسن نے تین اور عمید آصف نے دو کھلاڑیوں کو پویلین کی راہ دکھائی۔

پہلی اننگ 

میچ کے آغاز میں زلمی کپتان ڈیرن سیمی نے ٹاس جیت کر پہلے بیٹنگ کا فیصلہ کیا۔

زلمی اوپنرز کامران اکمل اور محمد حفیظ میدان میں آئے تو پہلی وکٹ کے لیے صرف تین رنز کی پارٹنرشپ قائم کر سکے۔

محمد حفیظ بغیر کھاتہ کھولے عثمان خان شنواری کی گیند پر آؤٹ ہو گئے۔

کامران اکمل نے دوسرے آنے والے بلے باز ڈیوائن اسمتھ کے ساتھ مل کر کھیل آگے بڑھایا۔ دونوں نے مل کر دوسری وکٹ کی شراکت میں 43 رنز جوڑے۔

ڈیوائن اسمتھ آؤٹ ہونے والے دوسرے کھلاڑی تھے۔ اسمتھ 16 گیندوں کا سامنا کرتے ہوئے 15 رنز بنا کر آؤٹ ہوئے۔

اوپنر کامران اکمل نے اس دوران 38 گیندوں کا سامنا کرتے ہوئے شاندار نصف سنچری مکمل کی۔

چوتھے آؤٹ ہونے والے کھلاڑی رکی ویسلز تھے۔ ویسلز گیارہ رنز بنا کر روی بوپارا کی گیند کا شکار بنے۔

زلمی کو پانچواں جھٹکا 118 کے مجموعی اسکور پر لگا۔ کامران اکمل 75 رنز بنا کر عثمان خان شنواری کی گیند پر روی بوپارا کے ہاتھوں کیچ آؤٹ ہو گئے۔

پشاور کی جانب سے کامران اکمل 75 رنز بنا کر ٹاپ اسکورر رہے۔ اوپنر بلے باز نے چھ چھکوں اور تین چوکوں کی مدد سے 51 گیندوں کا سامنا کرتے ہوئے اپنی اننگ مکمل کی۔

32 رنز کے انفرادی اسکور پرکامران اکمل کا کیچ کولن انگرام نے ڈراپ کیا۔

کامران اکمل آؤٹ ہوئے تو سعد نسیم نے کپتان ڈیرن سیمی کے ساتھ مل کو جارحانہ بیٹنگ کرتے ہوئے اسکور 160 تک پہنچایا۔

سعد نسیم 35 رنز بنا کر عثمان خان شنواری کا تیسرا شکار بنے۔

پشاور کی جانب سے ڈیرن سیمی نے 36 رنز کی ناقابل شکست اننگ کھیلی۔ کپتان نے چار چھکوں اور دو چوکوں کی مدد سے اپنی اننگ مکمل کی۔

آخری اوور کی آخری گیند پر لیام ڈاؤسن دو رنز کے انفرادی اسکور پر محمد عامر کی گیند پر آؤٹ ہو گئے۔

کراچی کی جانب سے عثمان خان شنواری نے تین کھلاڑیوں کو پویلین کی راہ دکھائی۔ انہوں نے چار اوورز کرا کر گیارہ رنز دیے۔


ٹیگز :
متعلقہ خبریں
نیوزی لینڈ

پاک نیوزی لینڈ دوسرا ٹی 20 میچ کل کھیلا جائے گا
محمد عامر muhammad amir

سب سے بڑا گول ورلڈ کپ ہے، محمد عامر
عماد وسیم

پاک نیوزی لینڈ پہلا ٹی ٹوئنٹی میچ، عماد وسیم کو باہر بٹھانے پر سابق کرکٹرز برہم