نواز شریف واپس نہیں آئے تو ان کی سیاست ختم ہو جائے گی، شہزاد اکبر


کراچی: وزیر اعظم کے معاون خصوصی بیرسٹر شہزاد اکبر نے کہا ہے کہ نواز شریف ضرور واپس آئیں گے کیونکہ اگر وہ علاج کے بعد وطن واپس نہیں لوٹے تو ان کی سیاست ختم ہو جائے گی۔

ہم نیوز کے پروگرام ایجنڈا پاکستان میں میزبان عامر ضیا سے بات کرتے ہوئے وزیر اعظم کے معاون خصوصی برائے احتساب بیرسٹر شہزاد اکبر نے کہا کہ احتساب کا عمل جاری ہے اور اس میں کہیں ٹھراؤ نہیں آیا ہے۔ ملک میں آوے کا آوا ہی بگڑا ہوا ہے ہم نے حکومت میں آنے کے بعد ایف آئی یو کو مضبوط کیا ہے۔

انہوں نے کہا کہ ہم نے بیرون ملک موجود غیر قانونی دولت کو ملک میں واپس لانے کے لیے بھی بہت کام کیا ہے۔ ہم نے معلومات کے تبادلے کے لیے مختلف ممالک کے ساتھ معاہدے بھی کیے اور مختلف ممالک سے معلومات کی بنیاد پر رقم بھی برآمد ہوئیں۔

شہزاد اکبر نے کہا کہ اسحاق ڈار نے بیرون ملک پڑے 200 ارب روپے کی بات کی تھی جو درست معلومات نہیں تھی۔ ہمیں بیرون ملک سے 11 بلین ڈالر کی تفصیلات ملی تھیں جس کی ریکوری کے لیے ہم نے کام بھی کیا۔

انہوں نے کہا کہ اسحاق ڈار کے کیس پر برطانیہ نے ہم سے معاہدہ کر لیا ہے لیکن اس کی بنیاد پر وہاں بھی ایک مقدمہ چلتا ہے اور باقاعدہ ایک طریقہ کار ہے۔ جس پر ہمارا کام جاری ہے۔ اس حوالے سے نیب کے ترجمان بھی برطانیہ کی وزارت داخلہ سے رابطے میں ہیں اور ہماری کوشش ہے کہ یہ معاملہ جلد سے جلد حل ہو جائے۔

وزیر اعظم کے معاون خصوصی نے کہا کہ بیرون ملک 10 ہزار جائیداد کی معلومات کے بعد سپریم کورٹ کی نگرانی میں ایک بینچ بنایا گیا تھا جس کے بعد جو جائیداد کی تفصیلات سامنے آئی تھیں ان میں سے کافی کو ریکور کیا اور مزید پر کام جاری ہے۔ کئی افراد نے ٹیکس اور جرمانے کی رقم ادا کر دی۔

انہوں نے کہا کہ گزشتہ سال 26 ممالک سے پاکستانیوں کی جائیداد کی تفصیلات سامنے آئی تھیں جو اب 46 ممالک تک چلا جائے گا۔ جن کی تفصیلات دسمبر میں ملنے کا امکان ہے لیکن میں قانون کی پابندی کی وجہ سے لوگوں کے نام اور ان کی تفصیلات نہیں بتا سکتا۔

یہ بھی پڑھیں الزامات کے باوجود حکومت اراکین آزاد گھوم رہے ہیں، مرتضیٰ وہاب

بیرسٹر شہزاد اکبر نے  کہا کہ پانامہ میں بڑے بڑے لوگوں کے نام آئے تھے جن کا مقدمہ سپریم کورٹ میں چلا تھا۔ ہمارے عدالتی نظام میں کئی مسائل موجود ہیں جس کی وجہ سے مقدمات انتہائی لمبے چلتے ہیں۔ ہمارا عدالتی نظام انتہائی پیچیدہ  ہے۔

انہوں نے کہا کہ نواز شریف اور آصف زرداری کے خلاف مقدمات زیر سماعت ہیں جبکہ نواز شریف کو دو مقدمات میں سزا بھی ہو چکی ہے۔ دیگر گرفتار رہنماؤں کے خلاف بھی تحقیقات جاری ہیں۔ احتساب کرنا اداروں کا کام ہے حکومت نے تو صرف ماحول اور وسائل فراہم کرنے ہیں۔

وزیر اعظم کے معاون خصوصی نے کہا کہ ہمارے ملک میں تو باریاں لگی ہوئی ہیں اور اس نظام سے این آر او کی صورت میں سیاستدانوں نے فائدہ بھی اٹھایا ہے۔ ہم نے نواز شریف کی میڈیکل رپورٹس کے بعد ہی انہیں باہر جانے کی اجازت دی تھی۔

میزبان عامر ضیا نے کہا کہ انصاف کے نعرے کی تکمیل کی جستجو میں حکومت نے سیاست میں بڑھتے ہوئے محاذ آرائی کی بھی پروا نہیں کی۔ حکومت نے کہا ان بڑے لٹیروں سے بھی رقم برآمد کی جائے گی اور سب لٹیروں کے خلاف احتساب کیا جائے گا۔


متعلقہ خبریں