سماجی رابطوں کی ویب سائٹ ٹوئٹر نے چھ ماہ سے غیر فعال اکاؤنٹس مستقل بند کرنے کا فیصلہ کیا ہے اور مذکورہ فیصلے کا اطلاق 11 دسمبر 2019 سے ہوگا۔
منگل کے روز جاری ہونے والے ایک بیان میں ٹوئٹر انتظامیہ کی جانب سے کہا گیا کہ مذکورہ فیصلے کا اطلاق ان کاؤنٹس پر بھی ہوگا جن کو چلانے والے اس دنیا میں نہیں رہے۔
بیان میں کہا گیا کہ فیصلے کا مقصد صارفین تک قابل بھروسہ معلومات کی فراہمی یقینی بنانا ہے اور اس سے صارفین کا اعتماد مضبوط ہوگا۔
ترجمان نے کہا کہ اکاؤنٹس کو غیر فعال بنانے کا عمل ایسے صارفین سے شروع کیا جائے گا جو امریکہ سے باہر ہیں۔
کمپنی کے مطابق غیر فعال اکاؤنٹس کے بعد ایسے اکاؤنٹس پر بھی نظر ثانی کی جائے گی جو لاگ ِان تو ہوتے ہیں لیکن اس پر کوئی سرگرمی نہیں ہوتی۔
کمپنی حکام کا مزید کہنا ہے کہ یہ اقدام صارفین کو اپنے اکاؤنٹس ایکٹو رکھنے کے لیے مجبور کرے گا اور انہیں پرائیوسی پالیسی پر عمل کرنے پر آمادہ کرے گا۔