اسلام آباد: وزیراعظم کی معاون خصوصی برائے اطلاعات فردوس عاشق اعوان کا کہنا ہے کہ مسلم لیگ ن کے صدر شہباز شریف ہیں مگر فیصلے کوئی اور کرتا ہے۔
سماجی رابطوں کی ویب سائٹ ٹوئٹر پر شیئر کیے گئے ایک پیغام میں ان کا کہنا تھا کہ شہباز شریف پارٹی میں تبدیلی لائیں پھر پارلیمان میں تبدیلی کی بات کریں۔
معاون خصوصی برائے اطلاعات نے تحریر کیا کہ کٹھ پتلی صدر ہونے سے بہتر ہے کہ پہلے اپنی پارٹی کے حقیقی صدر بن جائیں۔
شہباز شریف پہلے اپنی پارٹی میں ان ہاؤس تبدیلی لائیں پھر پارلیمان میں تبدیلی کی بات کریں۔ن لیگ کے صدر شہباز شریف ہیں لیکن فیصلے ان کی جگہ کوئی اور کرتا ہے۔کٹھ پتلی صدر ہونے سے بہتر ہے کہ پہلے اپنی پارٹی کے حقیقی صدر تو بن جائیں۔
— Firdous Ashiq Awan (@Dr_FirdousPTI) December 5, 2019
فردوس عاشق اعوان نے شہباز شریف کے ان ہاؤس تبدیلی والے بیان پر تبصرہ کرتے ہوئے لکھا کہ یہ بیان بلی کےخواب میں چھیچھڑے کے مترادف ہے۔
معاون خصوصی برائے اطلاعات کا کہنا تھا کہ ان حسرتوں کے لیے شہبازشریف سے ہمدردی ہی کی جاسکتی ہے، ان ہاؤس تبدیلی کی شوبازی نہ کریں بلکہ قانون سازی کی ذمہ داری پوری کریں۔
ان ہاؤس تبدیلی کا بیان بلی کے خواب میں چھیچھڑے کے مترادف ہے۔ ان حسرتوں کے لئے ان سے ہمدردی ہی کی جاسکتی ہے۔ ان ہاؤس تبدیلی کی شوبازی نہ کریں، پارلیمان میں آکر قانون سازی کی ذمہ داری پوری کریں۔
— Firdous Ashiq Awan (@Dr_FirdousPTI) December 5, 2019
ماضی کا حوالہ دیتے ہونے انہوں نے تحریر کیا کہ چیئرمین سینیٹ کے معاملے پر اپوزیشن کو جس ہزیمت کا سامنا رہا شہباز شریف شاید وہ بھول گئے ہیں۔
فردوس عاشق اعوان نے ٹویٹ میں لکھا کہ بلاول بھٹو زرداری اور مولانا فضل الرحمان بھی پارلیمان کی بالادستی کے اپنے دعوؤں پر عمل کریں اور قانون سازی سے متعلق اپنی جماعتوں کو یرغمال نہ بنائیں۔