اسلام آباد چیئرمین سینیٹ، ڈپٹی چیئرمین اور ارکان کی تنخواہوں میں 400 فیصد تک اضافے کے معاملے کی حکومت اراکین نے مخالفت کردی۔
وفاقی وزیر برائے منصوبہ بندی اور سابق وزیر خزانہ اسد عمر نے اپنے ٹوئٹر پیغام میں کہا کہ ان حالات میں مناسب نہیں کہ عوامی نمائندے اپنی مراعات میں اضافہ کریں۔
امید ہے کے جو اخباری خبریں پارلیمنٹ کے ارکان کی تنخواہ بڑھانے سے متعلق سینیٹ کی قرارداد کے متعلق آ رہی ہیں وہ درست نہیں. ان حالات میں بلکل بھی مناسب نہیں کے عوامی نمائندے اپنی مراعات میں اضافہ کریں. اگر خزانے میں گنجائش ہے تو اس کو عوام پر بوجھ کم کرنے کے لئے استعمال کرنا چاہیے
— Asad Umar (@Asad_Umar) February 2, 2020
انہوں نے کہا کہ خزانے میں گنجائش ہے تو عوام پر بوجھ کم کرنے کے لیے استعمال کرنا چاہیے۔
دوسری جانب سینیٹر فیصل جاوید نے کہا کہ سینیٹرز کی تنخواہیں بڑھانے کی مخالفت کریں گے، وزیراعظم عمران خان نے قومی وسائل بچانے کا کہا ہے۔
یہ بھی پڑھیں: اراکین سینیٹ کی تنخواہیں400 فیصد بڑھانے کا مطالبہ
ان کا مزید کہنا تھا کہ وزیراعظم نے خزانے کا ذاتی استعمال نہ کرنے کی ابتدا خود کی، عوامی نمائندے وزیراعظم کی تقلید کریں۔
بل آئندہ اجلاس کے ایجنڈے میں شامل
چیئرمین، ڈپٹی چیئرمین اور اراکین سینیٹ کی تنخواہوں میں 400 فیصد تک اضافے کا بل آئندہ اجلاس کے ایجنڈے میں شامل کر دیا گیا ہے۔
سینیٹ کا آئندہ اجلاس آئندہ ہفتے سوموار کو ہوگا جس کے ایجنڈے میں تین بل شامل ہیں۔
سینیٹ سیکرٹریٹ کی جانب سے چیئرمین اور ڈپٹی چیئرمین سینیٹ کی تنخواہوں، اراکین سینیٹ کی تنخواہوں اور سینیٹرز کو ملنے والے ٹریول الاونس میں اہل خانہ کو شامل کرنے کا بل بھی ایجنڈے میں شامل کیا گیا ہے۔
بل کے متن میں شامل ہے کہ ایک سال پہلے تک ایوان بالا میں اہل خانہ کے لئے ٹریول الاونس کی سہولت تھی جسے ختم کیا گیا، ارکان سینیٹ کے بیوی بچوں کا سالانہ ٹریول الاونس بحال کیا جائے۔
سینیٹرز کو سال میں ملنے والی جہاز کی ٹکٹیں ضائع ہو رہی ہیں کیونکہ اہل خانہ سرکاری خرچ پر ساتھ سفر نہیں کر سکتے۔
بلوچستان عوامی پارٹی کے سینیٹر نصیب اللہ بازئی نے سینیٹ سیکرٹریٹ میں اس مقصد کے تحت بل جمع کرایا کہ ملک میں بڑھتی مہنگائی کے پیش نظر اراکین کی تنخواہوں میں اضافہ چاہتے ہیں۔
ان کا کہنا تھا کہ یہ اہم بلز ہیں ان پر چیئرمین سینیٹ صادق سنجرانی سے مشاورت مکمل ہو چکی ہے۔ بل میں چیئرمین اور ڈپٹی چیئرمین کی تنخواہ سپریم کورٹ کے جج کے برابر کرنے کا مطالبہ کیا گیا ہے۔
انہوں نے کہا کہ سینیٹرز کی تنخواہیں ہائی کورٹ کے ججز کے برابر کرنے کی شق بھی بل کا حصہ ہے۔ امید ہے اپوزیشن ان بلز کو متفقہ طور پر منظور کرے گی۔
