بھارت کے دارالحکومت دہلی میں فسادات جاری ہیں جن میں درجنوں افراد جان کی بازی ہار گئے جب کہ متعدد زخمی ہو گئے ہیں۔
ذرائع ابلاغ کے مطابق تشدد کے واقعات دہلی کے شمال مشرقی علاقوں میں پیش آئے ہیں اور ان فسادات کے دوران150 سے زیادہ افراد زخمی ہو چکے ہیں۔ مقامی ذرائع ابلاغ کے مطابق زخمیوں میں متعدد کی حالت نازک ہے۔
یہ فسادات بھارت کے لیے اس لیے بھی جگ ہنسائی کا سبب بن رہے ہیں کہ امریکہ کے صدر ڈونلڈ ٹرمپ ان دنوں بھارت کے دورے پر ہیں اور ان کی ہندوستان میں موجودگی کے دوران بھی فسادات درجنوں افراد کی جان لے گئے ہیں۔
یہ بھی پڑھیں: نو مسلم کینیڈین بائیکر گرل کیلئے حمزہ علی عباسی کی دعا
ان فسادات کے خلاف اور مسلمانوں کے حق میں اداکار حمزہ علی عباسی نے آواز بلند کی اور کہا ہے کہ دنیا کو بھارت میں بپا اس صورت حال کا نوٹس لینا چاہیے۔
سماجی رابطوں کی ویب سائٹ ٹوئٹر پر شیئر کیے گئے اپنے پیغام میں انہوں نے لکھا کہ سڑکوں اور شاہراہوں پر مسلمانوں کا قتل عام کیا جارہا ہے، مسجدوں کو شہید کیا جا رہا ہے، مسلمانوں کے گھروں اور کاروباروں کو جلایا جا رہا ہے، پورا دہلی ہندوتوا کے انتہا پسندوں کی وجہ سے خوف کا شکار ہے۔
Several Muslims murdered on the streets, mosque vandalised, Muslim homes/businesses burned, DELHI terrorised by Hindutva extremists. The world MUST TAKE NOTICE or else this entire fragile region can descend into unprecedented violence. #DelhiBurning #DelhiRiots #DelhiCAAClashes
— Hamza Ali Abbasi (@iamhamzaabbasi) February 25, 2020
حمزہ علی عباسی نے لکھا کہ دنیا کو اس صورت حال کا نوٹس لینا چاہیے، اگر دنیا نے اس صورت حال نے کچھ نہ کیا تو پورا خطہ میں تشدد کی ایک ایسی غیر روایتی لہر اٹھے گی جسے قابو میں لانا ناممکن ہو جائے گا۔
خیال رہے کہ فسادات کا آغاز دہلی کے علاقے موج پور میں قانون شہریت کے خلاف خواتین کے احتجاج پر حملے سے ہوا اور مقامی پولیس بھی شدت پسند بلوائیوں کے ساتھ مظاہرین پر پتھراو کرتی رہی۔
یہ بھی پڑھیں: دہلی فسادات: ہلاکتوں کی تعداد19 ہوگئی، فوج بلانے کا مطالبہ
بی جے پی اور آر ایس ایس کے انتہا پسندوں نے پولیس کے ساتھ مل کر مظاہرین پر تشدد کیا جب کہ مسلمانوں کے مکانات، دکانیں اور گاڑیاں بھی جلائی گئی ہیں۔
پیر کے روز دہلی پولیس نے بی جے پی کے حامیوں کے سامنے خاموش تماشائی بنی رہی جب کہ مودی مخالف مظاہرین پرآنسو گیس اور لاٹھی چارج کا بے دریغ استعمال بھی کیا گیا۔
