سماجی رابطے کی ویب سائٹ فیس نے کورونا وائرس سے متعلق گمراہ کن اشتہارات پر پابندی عائد کرنے کا فیصلہ کر لیا۔
فیس بک انتظامیہ کے مطابق کورونا وائرس سے متعلق زیر گردش تمام گمراہ کن اشتہارات پر پابندی عائد کر دی جائے گی جبکہ کورونا وائرس کی روک تھام اور اس سے متعلق کسی بھی قسم کی مصنوعات کے اشتہارات پر بھی پابندی ہو گی جس کی وجہ سے عوام کو گمراہ کیا جا سکتا ہے۔
فیس بک کا یہ اعلان اس وقت سامنے آیا جب اسے اپنے پلیٹ فارم پر شائع کردہ مواد کی باقاعدگی سے جانچ پڑتال کا سامنا کرنا پڑ رہا ہے خاص کر ایسی اطلاعات جن میں جعلی خبروں کی عکاسی ہوتی ہے۔
ترجمان فیس بک کے مطابق فیس بک پر ایسے اشتہارات کی بھی اجازت نہیں ہو گی جس میں ماسک کے استعمال سے وائرس کے پھیلاؤ کی 100 فیصد ضمانت دی گئی ہو۔
یہ بھی پڑھیں وزیر اعلیٰ سندھ نے کورونا وائرس سے نمٹنے کیلئے ٹاسک فورس قائم کر دی
گزشتہ ماہ فیس بک انتظامیہ کا کہنا تھا کہ کورونا وائرس سے متعلق ایسے تمام مواد کو ہٹا دیا جائے گا جس میں وائرس سے متعلق دعوؤں کو جھوٹا اور نظریات کو جعلی قرار دیا گیا ہو جن کی نشاندہی عالمی ادارہ صحت سے وابستہ معروف تنظیمیں اور مقامی محکمہ صحت کے حکام نے کیا ہے۔
یہ بھی پڑھیں کورونا وائرس کیا ہے اور اس سے کیسے بچیں؟
واضح رہے کہ کورونا وائرس گزشتہ سال کے اختتام پر چین کے شہر ووہان سے شروع ہوا تھا جس کی وجہ سے اب تک 2 ہزار 7 سو سے زائد اموات ہو چکی ہیں۔
