اسلام آباد: وزیراعظم عمران خان نے کہا ہے کہ اسلام آباد کے علاقے بلیو ایریا میں آج اربوں روپے کے تجارتی منصوبے کا آغاز کر دیا گیا ہے۔
Launching the Islamabad Blue Area multi billion rupees commercial project today. This will not only provide jobs but will also attract investment from overseas Pakistanis. One mega project to be launched in Lahore and one in Karachi soon. pic.twitter.com/x1i7KlJ0hs
— Imran Khan (@ImranKhanPTI) March 1, 2020
سماجی رابطے کی ویب سائٹ ٹوئٹر سے جاری اپنے پیغام میں انہوں نے بتایا کہ اس منصوبے سے نہ صرف روزگار کے مواقع پیدا ہوں گے بلکہ اس سے بیرون ملک مقیم پاکستانیوں کوبھی سرمایہ کاری کےمواقع ملیں گے۔
انہوں نے کہا کہ اس طرح کے میگا منصوبے جلد لاہور اور کراچی میں بھی شروع کئے جائیں گے۔
مزید پڑھیں: پاکستان کے تجارتی خسارے میں نمایاں کمی
وزیراعظم عمران خان آج خود “نیو بلیو ایریا” منصوبے کا جائزہ لینے کے لئے سائیٹ پر آئے جہاں انہوں نے انتظامات کا جائزہ لیا۔
اس دوران وزیراعظم کو نیلامی کے طریقہ کار پر بھی بریفنگ دی گئی۔ انہیں بتایا گیا کہ اس منصوبے کے لئے ایف 9 پارک کے بالمقابل 170 کنال اراضی مختص کی گئی ہے۔
بریفنگ میں بتایا گیا کہ یہ کمرشل سٹی جدید تعمیرات اور ہائی رائز بلڈنگ پر مبنی عالمی طرز پر تعمیر ہو گی جس کے لئے اوورسیز پاکستانیوں کو سرمایہ کاری کی خصوصی دعوت دی جائے گی۔
یہ بھی پڑھیں: مالی سال 2019: تجارتی اور کرنٹ اکاؤنٹ خسارے میں نمایاں کمی ہوئی، مرکزی بنک
وزیراعظم کو بتایا گیا کہ اس منصوبے کے لئے لندن، دبئی، مانچسٹر، شکاگو اور گلاسکو سمیت بڑے شہروں میں روڈ شوز کئے جائیں گے۔
ذرائع کے مطابق وفاقی ترقیاتی ادارہ رواں سال اپریل کے پہلے ہفتے میں کمرشل نیلامی کرے گا۔ وزیراعظم کی ہدایت پراس میں حصہ لینے والوں کوسہولیات بھی فراہم کی جائیں گی۔
بتایا گیا ہے کہ اس میگا منصوبے کے لئے وزیراعظم کی ہدایت پر مکمل ایڈوانس ٹیکس دینے کی شرط بھی ختم کر دی گئی ہے۔
کامیاب بولی دہندگان کو رقم کی ادائیگی کے لئے 30 دن کا وقت ملے گا جبکہ اوررسیز پاکستانیوں کو بھی رقم کے انتظام کے لئے مناسب وقت دیا جائے گا۔
منصوبے سے ابتدائی طور پر حکومت کو 25 سے 30 ارب روپے حاصل ہوں گے ، حکومت آمدنی کا کچھ حصہ نیا پاکستان ہاوسنگ پراجیکٹ میں استعمال کرے گی۔
