کراچی سے تعلق رکھنے والے مجسمہ ساز نے کمال مہارت سے قائداعظم کا کا 12 فٹ اونچا مجسمہ تیار کرلیا۔
پچیس لاکھ مالیت میں تیار ہونے والے مجسمے کے حوالے سے آرٹسٹ نے دعویٰ کیا ہے کہ یہ قائداعظم کا سب سے بڑا مجسمہ ہے۔
شہر قائد کے معروف مجسمہ ساز عاصم مرزا نے ایک سال کی محنت کے بعد فائبر سے اس مجسمے کو تیار کیا ہے جس کی لاگت 25 لاکھ روپے ہے۔
قائد اعظم محمد علی جناح کو خراج عقیدت پیش کرنے والے مجسمہ ساز کا کہنا ہے کہ 20 سال کے تجربے کے بعد بچپن کی خواہش کی تکمیل ہوئی۔
انہوں نے کہا کہ تھری ڈی مجسمہ یوم پاکستان پر پاکستانیوں کے لیے تحفہ ہوگا۔
مجسمہ کی تیاری سے قبل قائد اعظم کی زندگی پر تحقیق بھی کی گئی ہے۔
مجسمہ سازی کے فن کے ماہر عاصم مرزا اس سے قبل بھی قابل دید مجسمات تخلیق کرچکے ہیں۔
مزید پڑھیں: قائداعظم محمد علی جناح کی شخصیت پر ایک نظر
محمد علی جناح جنہیں 1937 میں مولانا مظہرالدین نے ’قائداعظم‘ کا لقب دیا، کی ولولہ انگیز قیادت میں مسلمانان ہند نے الگ وطن ’پاکستان‘ حاصل کیا اور انگریزوں کے تسلط سے چھٹکارا پایا۔ قیام پاکستان کے بعد قائداعظم اس پاک وطن کے پہلے گورنر جنرل بنے اور 11 ستمبر 1948 میں وفات تک اس عہدے پر تعینات رہے۔
قائد اعظم محمد علی جناح 25 دسمبر 1876 میں کراچی میں پیدا ہوئے، انہوں نے ابتدائی تعلیم کا آغاز 1882 میں اپنے آبائی شہر سے کیا اور 1893 میں اعلیٰ تعلیم کے حصول کے لئے انگلینڈ روانہ ہوگئے۔ 1896 میں قائد اعظم نے بیرسٹری کا امتحان پاس کیا اور وطن واپس لوٹ آئے۔
محمد علی جناح پیشے کے لحاظ سے وکیل تھے اور وطن واپسی کے کچھ عرصہ بعد ہی قائداعظم کا شمار برصغیر کے مایہ ناز قانون دانوں میں کیا جانے لگا تھا۔
برصغیر واپسی کے بعد قائداعظم نے سیاست میں باضابطہ طور پر حصہ لیا اور 1906 میں انڈین نیشنل کانگریس میں شمولیت اختیار کی۔ کانگریس کا حصہ بننے کے بعد انہیں اندازہ ہوا کہ یہ جماعت برصغیر کے تمام باسیوں کی نہیں بلکہ صرف ہندوؤں کی نمائندہ جماعت ہے۔
قائداعظم نے 1913 میں آل انڈیا مسلم لیگ میں شمولیت اختیار کی مگر امید کا دامن نہ چھوڑا اور کانگریس کے ساتھ بھی کام کرتے رہے۔ کانگریس کی ہندو نواز پالیسیوں سے تنگ آکر بالآخر 1920 میں قائداعظم نے کانگریس کو خیرآباد کہہ دیا اور آخری سانس تک مسلمانوں کی نمائندہ جماعت مسلم لیگ سے وابستہ اختیار کر لی۔
اسی جماعت کی چھتری تلے ہی قائداعظم نے برصغیر کے مسلمانوں کے لیے علیحدہ وطن حاصل کیا۔
قائد اعظم محمد علی جناح جنہوں نے برصغیر کے مسلمانوں کو علیحدہ وطن دِلایا پاکستان کے لیے بہت کچھ کرنے کے خواہش مند تھے لیکن ان کی بیماری نے ان کے تعمیری منصوبوں کو پایہ تکمیل تک نہ پہنچنے دیا اور مسلمانانِ ہند 11 ستمبر 1948ء کو اپنے اس عظیم رہنما کی قیادت سے محروم ہوگئے۔
