راولپنڈی: وزیر ریلوے شیخ رشید نے کہا ہے کہ نیب ٹارزن بننے جا رہی ہے اور شہبازشریف گرفتار ہونے والے ہیں۔ نیب اگر ٹارزن نہ بنا تو اس کا ختم ہونا ہی بہتر ہے.
ہم نیوز کے پروگرام ’بریکنگ پوائنٹ ودھ مالک ‘ میں گفتگو کرتے ہوئے ان کا کہنا تھا کہ میری خواہش ہے کہ آئی پی پی پر ہاتھ ڈالا جائے،وزیراعظم عمران خان آخری آدمی ہیں جو ان کو گرفتار کرسکتے ہیں۔
انہوں نے کہا کہ پنڈی کے چھوٹے موٹے لوگ ہمیں خبریں دیتے ہیں، یہ لوگ 18 ویں چھوڑ کر 25 ویں ترمیم بھی مانیں گے،پنجاب میں ہلکی پھلکی موسیقی ضرور ہے.
شیخ رشید کا کہنا تھا کہ وزیراعظم عمران خان اور عثمان بزدار کے تعلقات میں استقامت نہیں ہے تاہم وزیراعلیٰ پنجاب کے ساتھ مین ووٹ وزیراعظم عمران خان کا ہے۔
ان کا کہنا تھا کہ شہبازشریف واپس آ کر لمبے پھنس گئے ہیں، وہ آج کل آن لائن تراویح پڑھ رہے ہیں۔
وزیر ریلوے نے کہا کہ بجٹ سے پہلے سیاست میں گرمی دیکھ رہا ہوں، ٹارزن کی واپسی دونوں طرف ہوگی، پی ٹی آئی کے لوگ بھی اٹھائے جائیں گے۔
پاکستان میں لاک ڈاؤن نہیں مذاق ہو رہا ہے، شیخ رشید
انہوں نے کہا کہ نوازشریف اور آصف زرداری کی کوئی سیاست نہیں دیکھ رہا جبکہ وزیراعظم عمران خان کو ٹائم پورا کرتے ہوئے دیکھ رہا ہوں۔
ان کا کہنا تھا کہ پاک فوج اور وزیراعظم عمران خان کے تعلقات زبردست ہیں۔
شیخ رشید کا کہنا تھا کہ انفارمیشن منسٹری سے کوئی آدمی خوش نہیں ہے اس منسٹری کو لوگ جیب کی گھڑی اور ہاتھ کی چھڑی سمجھنا چاہتے ہیں۔
ان کا کہنا تھا کہ جنرل،میوزیشن اور پولیٹیشن کبھی ریٹائرڈ نہیں ہوتے،لیفٹیننٹ جنرل ریٹائرڈ عاصم سلیم باجوہ کے تمام بیانات سی پیک پر آئیں گے۔
انہوں نے کہا کہ جتنا وزیراعظم عمران خان کا عوام سے رابطہ دیکھا ہے اتنا کسی کو نہیں دیکھا۔
وزیر ریلوے کا کہنا تھا کہ وزیراعظم سے درخواست کی کہ اتنا میڈیا نہ دیکھا کریں، میں خود ٹی وی نہیں دیکھتا اخبار پڑھتا ہوں۔
انہوں نے بتایا کہ شہباز شریف گرفتار ہوگئے تو شاہدخاقان عباسی پارٹی کے صدر بنیں گے انہیں مریم نواز کی سپورٹ حاصل ہے۔
ان کا کہنا تھا کہ بلاول بھٹو مجھے اچھا لگتا ہے اس سے دل لگی کرتا ہوں ،میں اپنا دشمن اور دوست خود سلیکٹ کرتا ہوں۔
ایک سوال کے جواب میں ان کا کہنا تھا کہ وزیراعظم عمران خان نیب کی ترمیم میں کوئی دلچسپی نہیں ہے اور ان کے فیصلے کو چیلنج کرنے والا کوئی نہیں ہے۔
