کورونا: کراچی میں 657 نئے کیسز سامنے آئے ہیں، وزیراعلیٰ سندھ


کراچی: وزیر اعلیٰ سندھ مراد علی شاہ نے کہا ہے کہ کراچی میں کورونا وائرس کے 657 نئے کیسز سامنے آئے ہیں۔

وزیراعلیٰ سندھ نے کہا کہ گذشتہ 24 گھنٹوں میں 3 نئے مریض انتقال بھی کرگئے ہیں۔

مراد علی شاہ نے بتایا کہ سندھ میں کورونا وائرس سے مرنے والوں کی تعداد 280 ہوگئی ہے۔

خیال رہے کہ پاکستان میں عالمی وبا قرار دیے جانے والے کورونا وائرس سے متاثرہ افراد کی تعداد 42 ہزار 125 ہو گئی ہے۔

یہ بھی پڑھیں: کورونا: پاکستان میں 903 اموات، 42 ہزار 125 افراد متاثر

ہم نیوز نے تازہ اعداد و شمار کے حوالے سے بتایا ہے کہ ملک میں کورونا وائرس کے سبب 903 افراد بھی جاں بحق ہوچکے ہیں جب کہ 11 ہزار 922 افراد نے اپنے یقین، مضبوط قوت ارادی اور طاقتور مدافعتی نظام کی بدولت مہلک وبا کو شکست بھی دی ہے۔

اعداد و شمار کے مطابق صوبہ پنجاب میں کل 15 ہزار 346 کیسز رپورٹ ہوئے ہیں جب کہ سندھ میں رجسٹرڈ کیسز کی تعداد 16 ہزار 377 ہے۔

کورونا کے صوبہ خیبرپختونخوا میں 6 ہزار 61، بلوچستان میں 2 ہزار 692، آزاد کشمیر میں 112 اور گلگت بلتستان میں 540 کیسز رجسٹرڈ ہوچکے ہیں جبکہ اسلام آباد میں کورونا متاثرین کی تعداد 997 تک جا پہنچی ہے۔

یہ بھی پڑھیں: پاک فوج کے میجر محمد اصغر کورونا کے خلاف لڑتے ہوئے شہید

نیشنل کمانڈ اینڈ آپریشن سنٹر کی جانب سے فراہم کردہ اعداد و شمار کے مطابق خیبرپختونخوا میں کورونا وائرس سے سب سے زیادہ 318 اموات ہوئی ہیں جب کہ سندھ میں 277، پنجاب میں 260، بلوچستان میں 36، اسلام آباد میں 07 اور گلگت بلتستان میں چار افراد نے دار فانی سے کوچ کیا۔

آزاد کشمیر میں بھی کورونا وائرس کے سبب ایک فرد جان کی بازی ہار گیا ہے۔

گزشتہ 24 گھنٹوں کے دوران ملک بھر میں 13 ہزار 925 ٹیسٹ کیے گئے جب کہ مجموعی طور پر تین لاکھ 87 ہزار 335  ٹیسٹ کیے جا چکے ہیں۔

پاکستان میں کورونا وائرس کو سامنے آئے دو ماہ سے زائد کا عرصہ بیت چکا ہے۔ ابتدا میں کیسز میں اضافے کی رفتار سست تھی لیکن اب اس میں تیزی سے اضافہ دیکھنے میں آرہا ہے۔


متعلقہ خبریں