جمال خاشقجی کے بیٹوں کا والد کے قاتلوں کو معاف کرنے کا اعلان

ریاض: ترکی میں قتل کیے جانے والے سعودی صحافی جمال خاشقجی کے بیٹوں نے والد کے قاتلوں کو معاف کرنے کا اعلان کر دیا۔

عرب ٹی وی چینل الجزیرا کے مطابق جمال خاشقجی کے بیٹے صلاح خاشقجی نے سماجی رابطے کی ویب سائٹ ٹوئٹر پر جاری اپنے بیان میں کہا ہے کہ اس ماہ مقدس رمضان کی پاک رات میں اللہ کی اس بات کو ذہن میں رکھتے ہیں کہ جو معاف کرتا ہے اور مفاہمت کا راستہ اختیار کرتا ہے تو اس کا اجر اللہ دے گا۔

 

ان کا کہنا تھا کہ ہم شہید جمال خاشقجی کے بیٹے اپنے والد کے قاتلوں کو معاف کرنے کا اعلان کرتے ہیں اور اس کا اجر اللہ سےمانگتےہیں۔

جمال خاشقجی قتل کیس: پانچ افراد کو سزائے موت

یاد رہے کہ 23 اکتوبر 2018 کو سعودی صحافی جمال خاشقجی کو استنبول میں قتل کیا گیا تھا اور ان کی  لاش کے ٹکڑے مبینہ طور پر سعودی قونصل جنرل کے گھر سے برآمد ہوئے تھے۔

ذرائع ابلاغ کے مطابق صحافی کی لاش کے ٹکڑے سعودی قونصل جنرل کے گھر کے باغ میں دفن کیے گئے تھے۔ میڈیا رپورٹس کے مطابق جمال خاشقجی کا جسم کئی ٹکڑوں میں تقسیم کیا گیا تھا اور ان کا چہرہ مسخ کر دیا گیا تھا۔

واضح رہے سعودی صحافی خا شقجی دو اکتوبر 2018 کو استنبول میں سعودی قونصل خانہ میں داخل ہونے کے بعد لاپتہ ہوگئے تھے۔ ان کی گمشدگی کے کچھ دن بعد ترکی کا موقف سامنے آیا تھا کہ خاشقجی کو قتل کیا جاچکا ہے۔

خاشقجی کی گمشدگی کے بعد مغرب کی طرف سے سعودی عرب پر دباؤ بہت بڑھ گیا تھا کہ وہ اس گمشدگی کے بارے میں قابل اعتبار وضاحت فراہم  کریں جبکہ متعدد مغربی ممالک نے سعودی عرب میں ہونے والی سرمایہ کاری کانفرنس کے بھی بائیکاٹ کا اعلان کیا تھا۔

متعلقہ خبریں

ٹاپ اسٹوریز