اسلام آباد: وفاقی وزیر سائنس اینڈ ٹیکنالوجی فواد چوہدری کی جانب سے کل ملک بھر میں کل بروز اتوار عید الفطر منانے کے بیان کے بعد وفاقی وزیرجہاز رانی علی زیدی بھی ان کی حمایت میں سامنے آگئے۔
اپنے ایک بیان میں علی زیدی نے کہا کہ ملک بھر میں لوگوں کی بڑی تعداد کل عید منائے گی۔
انہوں نے مزید کہا کہ ہمیں تمام مسائل حل کرنے کیلئے ٹیکنالوجی کا استعمال کرنا چاہیے۔ وفاقی وزیرعلی زیدی نے فوادچودھری کوشاباش بھی دے دی۔
اس سے قبل وفاقی وزیر سائنس و ٹیکنالوجی فواد چوہدری نے کہا کہ پاکستان میں اتوار کو عید الفطر منائی جائے گی۔
وفاقی وزیر سائنس و ٹیکنالوجی فواد چوہدری نے پریس کانفرنس کرتے ہوئے کہا کہ مذہبی تہوار سے متعلق چاند ہمیشہ تنازع بنا رہتا ہے جبکہ مذہبی تہوار کو یکجہتی کی علامت بننا چاہیے۔
یہ بھی پڑھیں: سعودی عرب میں شوال کا چاند نظر نہیں آیا، عید 24 مئی کو ہو گی
انہوں نے کہا کہ یہ سائنس کا دور ہے اور اب چاند دیکھنا کوئی مسئلہ نہیں ہے۔ ریاست فرقہ واریت سے بالاتر ہوتی ہے۔ چاند دیکھنے سے ٹیکنالوجی کا تعلق نہ ہونے کی بات مسترد کرتا ہوں۔
فواد چوہدری نے کہا کہ چاند کو زمین کے گرد چکر مکمل کرنے میں 29 دن سے کچھ زیادہ لگتا ہے اور سورج کی روشنی میں چاند نظر نہیں آتا۔ چاند کی اونچائی 6.5 ڈگری ہونی چاہیے جبکہ سورج غروب ہونے اور چاند نکلنے میں 38 منٹ کا فرق ہونا چاہیے۔
وفاقی وزیر نے کہا کہ چاند نظر آنے کا کم سے کم زاویہ 9 ڈگری کا ہونا چاہیے۔
انہوں نے کہا کہ کل دنیا کے تمام اسلامی ممالک میں عید منائی جائے گی اور 24 مئی بروز اتوار کو پاکستان میں بھی عید ہو گی۔
فواد چوہدری نے کہا کہ 22 مئی کی رات 10 بجکر 39 منٹ پر شوال کے چاند کی پیدائش ہو چکی ہے۔ سانگھڑ، بدین، ٹھٹھہ، جیوانی اور پسنی میں چاند 7 بجکر 36 منٹ سے 8 بجکر 14 منٹ تک دیکھا جا سکتا ہے جہاں چاند کی عمر 20 گھنٹے کی ہو گی۔
