اسلام آباد: وزیر مملکت برائے سیفران اور انسداد منشیات شہریار آفریدی بھی کورونا وائرس کا شکار ہو گئے ہیں۔
سماجی رابطے کی ویب سائٹ ٹوئٹر پر شیئر کیے گئے ایک پیغام میں شہریار آفریدی نے کہا کہ میرا کورونا وائرس کا ٹیسٹ مثبت آیا ہے اور میں نے ڈاکٹرز کی ہدایت پر اپنے آپ کو گھر پر آئسولیٹ کرلیا ہے۔
انہوں نے مزید تحریر کیا کہ رب ذوالجلال سے دعا ہے کہ وطن عزیز کو موذی وبا سے محفوظ بنائے اور وزیراعظم عمران خان سرخرو ہوں۔
میرا کرونا وائرس ٹیسٹ پازیٹو آیا ہے اور میں نے ڈاکٹرز کی ہدایت پر اپنے آپ کو گھر پر آئسولیٹ کرلیا ہے. رب ذوالجلال سے دعا ہے کہ وطن عزیز کو موذی وباء سے محفوظ بنائے اور وزیراعظم عمران خان سرخرو ہوں. آمین
— Shehryar Afridi (@ShehryarAfridi1) May 29, 2020
خیال رہے کہ شہریار آفریدی پہلے سیاست دان نہیں ہیں جو کورونا وائرس کا شکار بنے ہیں، متعدد سیاسی شخصیات اس عالمی وبا کی زد میں آ چکی ہیں۔
پاکستان تحریک انصاف (پی ٹی آئی) کی رکن پنجاب اسمبلی شاہین رضا کورونا وائرس سے انتقال کر گئی تھیں۔
پاکستان پیپلز پارٹی (پی پی پی) کے رہنما وزیر تعلیم سندھ سعید غنی ملک کے پہلے سیاستدان تھے جن میں کورونا وائرس کی تشخیص ہوئی تھی، وائرس کی تشخیص کے بعد انہوں نے خود کو قرنطینہ کر لیا تھا جس کے بعد وہ صحتیاب ہو گئے تھے۔
یہ بھی پڑھیں: پاکستان میں کورونا سے ایک ہی دن میں ریکارڈ 78 اموات
اسپیکر قومی اسمبلی اسد قیصر اور ان کے دو بچے کورونا وائرس کا شکار بنے تھے جب کہ گورنر سندھ عمران اسمٰعیل بھی وائرس سے متاثر ہوئے تھے تاہم چند روز قبل یہ دونوں وائرس سے صحتیاب ہو گئے تھے۔
ملسم لیگ ن کے رہنماؤں نہال ہاشمی اور امیر مقام میں بھی کورونا وائرس کی تشخیص ہوئی تھی جس کے بعد دونوں رہنماؤں نے خود کو قرنطینہ کر لیا تھا۔
